Ayuda sa D'bantayan wa pa

CEBU, Philippines - Gipahigayon kagahapong adlawa sa kagamhanan sa lungsod sa Daanbantayan ang ilang tinuig nga Haladaya Festival apan ang gisaad sa kagamhanan sa siyudad sa Sugbu nga tunga sa milyon ka pesos wala pa mahatag.

Sigon pa ni Mayor Michael Rama nga ang P500 mil nga hinabang financial alang kang Daanbantayan Mayor Maria Luisa Loot wala pa mapreparar sa iyang buhatan.

Kini tungod kay wala pay resolusyon gikan sa konseho sa siyudad sa Sugbu nga nagtugot nga ihatag ang maong gahin sanglit kinahanglan pa kining tukion sa konseho sa siyudad karong adlaw nga Biyernes kun kinahanglan ba silang mohatag niini.

Apan mipasalig gihapon ang mayor nga madawat ra unya sa mayor sa lungsod sa Daanbantayan ang maong kantidad.

Ang maong pasalig ni Rama kang Loot nakaingon sa pagpahibalo ni Cebu Gob. Gwendolyn Garcia nga iyaha kining tupngan og napulo ka pilo pinaagi sa paghatag og P5 milyones sa mga nasunogan sa T. Padilla.

Ang pamahayag ni Garcia giisip sa higpit niining karibal nga si kanhi Cebu City mayor ug karon Kong. Tomas Osmeña nga susama sa usa ka pagpanghagit tungod lang kay modonar ang dakbayan kang Loot. (BANATNEWS)