Grupo sa de kalibreng tulisan miigo sa negosyante

CEBU, Philippines - Grupo sa mga tulisan nga naghupot og tag-as nga kalibre sa armas maoy nanulis sa usa ka negosyante sa sitio Pajo, barangay Cansaga, lungsod sa Consolacion sa miaging Sabado sa gabii ug nakasakiyo og P200 mil.

Si SPO4 Joseph Yongco sa Consolacion Police Station sa follow up nga gihimo kagahapon nagkanayon nga base sa ilang pakisusi, nasayran nga dili ordinaryong grupo sa armadong mga tulisan ang miigo sa negosyanteng si Lucia Herana, 48, kinsa kuyog sa anak niining si Archie atol sa insidente.

Dugang ni SPO4 Yongco nga pipila ka mga saksi nga nakamatikod sa hitabo miasoy sa panagway sa duha ka wala mailhing lalaki nga nagsakay og motorsiklo nga naghupot og mga pistola.

Si SPO4 Yongco miingon nga ilang nasuta nga daghan pa og mga kauban ang duha ka tulisan nga nagbitbit og dili ordinaryong matang sa armas.

Sa nasayran nga niadtong miaging Sabado sa gabii gikan pa sa ilang pagpanira sa tindahan si Herana ug mipauli kuyog sa anak nga lalaki sakay sa service nga multicab.

Gitionan ang mga biktima sa armas ug dungan ang pagpahibalong tulis   ug mapugsanong mikuha sa halin sa tindahan.

Gitataw ni SPO4 Yongco nga ilang nailhan ang maong grupo sa mga tulisan gikan sa pipila ka mga saksi ug sa dihang ilang nasubay ang nahimutangan, ilang nasuta nga grupo kini sa banggiitang tulisan gikan sa laing lalawigan.

Sa sayo pa, ang kapolisan mipahimangno sa publiko, ilabi na sa mga magpapatigayon mahitungod sa intelligence report kalabot sa grupo sa mga armadong tulisan nga posibleng mangigo bisan unsang orasa. (BANATNEWS)