Crisis management team tokuron

CEBU, Philippines - Ang kagamhanan sa dakbayan sa Sugbo naglaraw nga magtukod og usa ka crisis management team (CMT) aron pagsiguro nga andam kanunay ang dakbayan sa unsa mang krisis nga mahitabo.

Nahunahunaan kini ni Mayor Michael Rama human sa hostage crisis nga nahitabo sa Manila diin walo ka turistang langyaw ang namatay.

Matud pa ni Rama nga gusto niyang tulin ug paspas ang dagan sa negosasyon kung adunay hostage drama nga mahitabo dinhi.

Ang CMT kinahanglang langkoban sa mga tawo nga may hiyas ug talento sa pagpanulti ilabi na sa mga delikado kaayong sitwasyon, makaantigo mopahigayon og negosasyon ngadto sa hingtungdang partido aron makabaton og malinawong solusyon ang usa ka krisis nga mahitabo.

Usa sa nakita ni Rama nga angayang padumalahon sa CMT mao ang retiradong opisyal sa kapolisan nga si Romeo Cordova kinsa may abilidad sa pagka-negotiator kung may mahitabong hostage crisis sa dakbayan.

“Nindot kaayo paminawon, nga andam ta kanunay bisan talagsaon ra ang maong hitabo,” nagkanayon si Rama.

Unya kadugtong niini nahunahunaan usab sa mayor ang pagtukod og usa ka   command center alang sa unsang emerhensiya nga mahitabo sama sa linog, bagyo, sunog, ug uban pa.

Tawgon niya kini og Quick Response Emergency Team (QRET) nga langkoban sa pipila ka mga sakop sa Marine, kapolisan,   Cebu-Emergency Rescue Unit Foundation, Civil Defense, Cebu City Disaster Coordinating Council ug uban pang pampubliko ug pribadong ahensiya nga andam motabang sa panahon sa kalamidad o aksidente nga mahitabo.  (BANATNEWS)