Ginang gipusil sa Villagonzalo II

CEBU, Philippines - Nakaangkon og samad pinusilan ang usa ka ginang human kini gipusil makaduha sa iyang paa sa Villagonzalo II, barangay Tejero ning siyudad alas 6:30 kagahapon sa buntag. Ang biktima giila nga si Mia Cabonita, 37, molupyo sa nahisgutang lugar. Gipusil kini sa usa ka ginganlag “Bangkay” nga molupyo sa maong dapit.

Matud pa sa biktima nga samtang nanglakaw siya kauban sa iyang anak nga babaye aron mopalit og tsinelas sa usa ka convenience store kalit lang miabot ang suspetsado sa ilang luyo ug gipabuto ang wala mailhing armas ug naigo kini sa wala ug tuong bahin sa paa sa biktima. Gibutyag usab sa biktima nga adunay kalagot kaniya ang suspetsado human nga gipasangilan ang iyang kaipon nga si Fredmil Nombrado nga mitug-an kini sa awtoridad mahitungod sa ilegal nga binuhatan sa suspetsado.

Ang biktima dali nga gidala sa Cebu City Medical Center samtang ang suspetsado dali nga nakaikyas human sa hitabo. (BANATNEWS)