Cluster ni Lollipop nangharos sa bag-ong Comparsa sa M'daue

CEBU, Philippines - Giharos sa pagdawat ang mga ganti sa cluster number 7 nga gilangkoban sa barangay Umapad ug barangay Cambaro nga gipangulohan ni Konsehal Emmarie Lollipop Ouano Dizon tungod usab sa mga kadaugan nga ilang naangkon sa labing unang pagpahigayon og indigay sa Comparsa sa Mandawe niadtong miaging Sabado.Naglakip sa kadaugan nga ilang naangkon   mao ang best in musicality, best in production design, grand prize winner sa Comparsa 2010 ug ikaduha usab nga mananaog sa street dancing category.

Ang cluster number 10 nga gilangkoban sa barangay Subangdaku ug barangay Tipolo maoy nakaangkon sa unang ganti sa street dancing ug ikatulong ganti usab ang cluster number 2 nga gilangkoban sa barangay Banilad ug barangay Bakilid. Sa mini competation maoy nakaangkon sa unang ganti ang cluster number 10 ug kaduha usab ang cluster number 8 nga gilangkoban sa barangay Ibabao ug barangay Looc ug ikatulong ganti usab ang sa Subangdaku ug Tipolo.

Gawas sa mga tropiyo ang ganting salapi nga madawat sa kadaugan sa matag kategoriya gikan sa P75, 000 ngadto sa P25, 000.

Si Mayor Jonas Cortes sa iyang mensahe sa pagbukas sa maong kalihokan iyang gipadayag nga ang Comparsa sa Mandawe maoy kalihokan sa matag katapusang Sabado sa bulan sa Agosto sa matag tuig nga pagsaulog sa Founding Anniversary sa dakbayan sa Mandaue. Gitataw niya nga ang Mantawi Festival ang nagpabilin nga kabahin sa mga kalihukan sa matag tinuig nga pangilin sa Mayo 8 isip pagpahinungod sa patron sa dakbayan nga si Señor San Jose. (BANATNEWS)