Media gipahimangnoan sa CMFR

CEBU, Philippines - Tungod sa nanggawas nga dili maayong komentaryo kabahin sa live footages sa pagkober sa mga sakop sa media sa nahitabong hostage taking niadtong Agosto 23, mipasidaan ang Center for Media Freedom and Responsibility (CMFR), usa ka media watchdog, nga kun dili makat-on ang media sa ilang responsibilidad dako ang kahigayonang mapuhalan ang kagawasan niini kun moaksyon na ang gobiyerno.

Sa gipagawas nga press statement sa CMFR, kini mipasabot nga nameligro ang kagawasan sa media gumikan sa mga nakit-ang kasaypanan usab sa habig sa maong sektor sa pagbantay o pagmatngon sa ilang mga coverage kun makaayo ba kini sa sitwasyon o dili.

Sumala pa sa maong grupo nga wala na unta kinahanglana pang hasta ang gobiyerno mohimo na og mga lakang aron dili na masubli ang susamang trahedya. Gumikan sa nahitabo daw giimbitar sa media ang gobiyerno nga moaksyon     aron malimitahan ang kagawasan niini sa pagkober sa mga panghitabo.

Niadtong Agosto 23, si kanhi Sr. Insp. Rolando Mendoza mi-hostage sa 25 ka mga tawo, 22 niini mga turistang taga Hong Kong sulod sa usa ka tourist bus sa Quirino Grandstand sa Rizal Park.

Ang nagkadaiyang media networks mikober niini apan giingong usa sa mga tv footages maoy nakapainit sa ulo ni Mendoza dihang mibahad kini nga iyang tagsa-tagsaon og pamatay ang mga hostages kun dili buhian sa mga polis ang iyang igsuong si SPO2 Gregorio Mendoza kinsa giaresto niadtong tungura tungod sa pasangil nga nakigkunsabo kini sa hostage taker.

Sumala pa sa CMFR kinahanglan unta nga ang mismong media outfits mao nay boluntaryong mohimo sa ilang responsibilidad pinaagi sa pag-delay sa telecasts sa ilang balita.

Ang CMFR namahayag nga wala na kinahanglana pang adunay opisyal sa PNP nga maoy mopahimangno sa media sanglit ang mismo untang media outfits na maoy mihimo og kaugalingong ‘policing’ sa ilang coverage tungod kay mas importante ang kaluwasan sa mga hostages labaw sa tanan. Siyam ang patay sa hitabo.

Ang media aduna nay kaugalingong protocol nga gisunod sa pagkober og susamang mga insidente apan daw wala kini maobserbahi atol sa maong krisis.

“Both are properly the calls of media organizations, which should have enough sense to know when to delay the airing of broadcasts as well as when to “black out”, the fundamental criterion for the latter being the responsibility not to make an already bad situation worse,” matud pa sa CMFR. Si 6th District Luigi Quisumbing ug Senador Ramon ‘Bong’ Revilla Jr. parehong misang-at og mga balaudnon nga gihulagway karon sa media nga usa ka matang sa pagpuhal sa kagawasan sa mga tigbalita.

Si Quisumbing miklaro nga ang iyang House Bill 2737 wala magpasabot sa pagpugong sa kagawasan sa media kondili alang sa kaluwasan sa mga inosenteng kinabuhi ug sa awtoridad nga diha sa operasyon.

Samtang si Revilla mipasaka sa iyang “Usisero” bill nga nagdili sa mga manguryuso nga mopaduol sa susamang mga hitabo kini aron paglikay sa disgrasya ug follow up nga operasyon sa awtoridad. Atol sa hostage taking ni Mendoza, usa ka batan-on ang naigo sa saag nga bala, usa siya sa mituyo og anha aron lang manguryoso.

“No matter how seemingly well meaning, in the Philippine experience, such bills end up covering more than they originally intended. With public support—and such support is likely given the growing outrage over police mishandling of the August 23 crisis as well as the media’s role in it—such bills will take on lives of their own, and are likely to end up imposing greater restrictions on press freedom itself,” dugang pahimangno sa CMFR.

Giawhag karon sa CMFR nga babagan sa media ang bisan unsang lakang nga magpuhal sa kagawasan niini apan kinahanglang pangunayan sa maong sektor ang pagbantay nga dili mausab ang mga kasaypanan sa pagkober sa mga balita. (BANATNEWS)