Nagpasalba sa armas nasikop

CEBU, Philippines - Gumikan sa pagpasalba sa iyang armas de fuego mikagulkol sa prisohan ang usa ka ulitawo human kini masikop sa mga otoridad didto sa barangay Cansuje, lungsod sa Argao sa miaging gabii.

Ang suspetsado mao si Castro Banados, l9, nga taga Argao. Nasayran nga nagkaguliyang ang katawhan sa Cansuje dihang nadungog nila ang nagpaka-paka nga mga buto sa armas de fuego sa suspetsado sulod sa basketball court sa barangay.

Gumikan sa kalisang nga may maigo kanila ilabi na sa mga bata, mitawag ang mga molupyo og mga barangay tanod.

Si Cerino Manila, 46, nga maoy hepe sa mga tanod sa barangay maoy miresponde sa alarma , apan wala nila masikop ang suspetsado kay misukol kanila ug nagdumili sa pagpadakop. Misibat ang suspetsado ngadto sa barangay Alambijod sa maong lungsod, apan wala siya makaikyas sa mga kamot sa kapitan sa maong barangay.