Kawatan gipan-an og P22 mil

CEBU, Philippines - Usa ka suspetsadong kawatan kinsa giilang idlas kaayo , sa katapusan nasikop ra dihang mikubit sa paon nga P22 mil sa iyang kaugalingon uyoan didto sa balay niini sa sitio San Isidro, barangay Mojon, lungsod sa Bantayan sa miaging kaadlawon.

Ang suspetsado nailhang si Marlon Deo, 25, lumad nga taga barangay Takuling, dakbayan sa Bacolod, apan kasamtangang nagpuyo sa balay sa iyang uyoan nga si Antonio Deo sa Bantayan.

Ang kapolisan sa Bantayan mibutyag nga sa wala pa masikop ang suspetsado, gitumbok kining suspetsado usab sa mga nahitabong kawat sa lungsod sa milabay’ng mga adlaw.

Ang uyoan kinsa mibati na og kaulaw sa gibuhat sa iyang pag-umangkon, mao mismo ang nangita og paagi sa pagpiho sa bisyo sa suspetsado pinaagi sa pagbutang og paon nga P22 mil sa ibabaw sa ilang lamesa sa sulod sa iyang balay.

Unya gipanup-an kini ni Antonio ug dihang gikuha na sa suspetsado ang maong salapi, diha-diha gisikop dayon siya sa iyang uyoan ug gihatod ngadto sa kapolisan sa lungsod.

Didto gipasabot ni Antonio ang iyang nasaksihan sa iyang pag-umangkon busa gitugyan niya sa kapolisan ang suspetsado aron kapasakaan kini og tukmang kaso (BANAT NEWS)