CEBU, Philippines - Patay ang usa ka lalaki human gitusak og bala sa duha ka wala mailhing lalaking nagsakay og motorsiklo diha sa sitio Tigkahon sa barangay Bankal, dakbayan sa Lapulapu alas-10 pasado ang takna sa miaging gabii.
Ang namatay mao si Urac Daligdig, 31, lumad nga taga Marawi City ug kasamtangang nagpuyo sa sitio Iba sa barangay Basak sa nahisgutang dakbayan.
Si PO3 Dioscoro Arong sa Homicide Section sa kapolisan sa maong dakbayan miingon nga naglakaw lang sa maong dapit ang biktima dihang gihunongan sa mga gikatahapan.
Giingong nangutana pa sa biktima ang duha kun asa ang agianan padulong sa barangay Bankal ug dihang gitudlo sa biktima nga kini naa ra sa unahan kalit kining gipusil tulo ka higayon sa tawong nag-angkas sa motorsiklo.
Human sa maong pagpamusil ang duha ka wala hiilhing mga lalaki mipabulhot sa pagpadagan sa giluwanan nilang motorsiklo pahilayo sa maong dakpit.
Ang biktima nga nakabaton og mga samad pinusilan sa lawas namatay nga nagbuy-od sa daplin sa dalan ug wala na kini madala pa ngadto sa tambalanan.
Si Arong miingon nga nakuha nila sa crime scene ang mga kabhang sa bala sa .9mm nga pistola ug gituohang maoy gigamit nga armas sa pagpusil patay sa biktima.
Wala pa matino sa mga imbestigador kun unsay posibleng motibo sa maong krimen. (BANAT NEWS)