Suporta sa gobyerno gipaabot

CEBU, Philippines - Hayan nga moharuhay ang panginabuhi sa gagmay’ng negosyante sa dakbayan sa Mandaue sama sa mga nangluto og bibingka, tagaktak, budbod ug uban pang makaon kun abagan sila sa kagamhanan.

Sa usa ka resolusyon nga sinuwat ni konsehal Emmarie Lollipop Ouano, sa dakbayan sa Mandaue, nga gipalabang atol sa ilang regular nga session iyang giawhag ang Department of Trade and Industry (DTI) nga mopasiugda og mga pagbansaybansay alang sa pagpamuhat sa maong matang sa lumad nga produkto.

Si Konsehal Dizon mipasabot sa kadako sa papel sa taga DTI aron labing moumento ang kamadanihon sa mga lumad nga produkto sa dakbayan kun makat-onan sa mga nagpabrika niini ang tukmang desinyo sa putos sa ilang produkto.

Matud pa ni Dizon nga ang maong abilidad anaa sa taga DTI busa kun dili lamang ihikaw ug idawo sa maong ahensya ang ilang hangyo tataw kaayo ang mga bibingka, tagaktak, siyakoy, budbod ug ubang mga pagkaong lumadnon nga ginama diha sa Mandaue, pamaliton kini sa mga turistang langyaw. 

Miingon si Ouano nga dako kaayo og impact ang desinyo sa putos sa usa ka butang baligya ilabi na kun pagkaon ang produktong puston. Dugang pa ni Konsehal Dizon nga ubos sa One Town One Product (OTOP)) priority program sa DTI ang mga ginama nga kalan-on gikan sa dakbayan kinahanglang molambo usab kay kabahin kini sa panginabuhi sa mga lumad nga Mandauehanon.

Matud pa ni Dizon nga hangotd karon ang mga putos sa bibingka, budbod, tagaktak, siyakoy ug uban pa nagpabilin lang gihapong dahon sa saging. Matud niya nga kinaraan na kaayo kining klaseha sa putos ug mas maayong palainan na usab unta   ug moduyog sa modernong urog karong panahona.

“Some of these delicacies, especially Bibingka and Tagaktak are still packaged in its usual packaging, name, banana leaves and ordinary plastics for tagaktak,” nagkanayon si Dizon sa iyang resulosyon.

Gitataw ni Dizon nga ang Mandaue City Free Opportunity Livelihood Technology and Enterpreneurial Courses (MCFOLTECH) maoy buhatan nga gitukod sa lokal nga kagamhanan aron sandigan sa katawhan sa ilang panginabuhi.  – BANAT NEWS