P50 mil gi-uli sa 9-anyos

CEBU, Philippines - Nakit-an sa usa ka tinun-an diha sa kalibunan sa sulod sa tugkaran sa ilang eskuylahan ang P50 mil nga kwarta nga tinulis diha sa Mali-aw Elementary School sa barangay Mali-aw lungsod sa Badian niadtong Huwebes sa ala 1:00 sa hapon.

Usa ka 9-anyos (pangalan gipugngan sa Banat News alang sa iyang seguridad), tinun-an sa grade-3 sa maong tunghaan ug molupyo sa maong lugar ang unang nakakita sa maong kantidad nga gibandol ug gibutang sa kalibunan dihang migawas kini sa tunghaan aron pagtuman sa sugo sa lawas.

Matud pa ni PO2 Ivan Rey Juarez sa Badian Police Station dihang nahinabi sa Banat News human mapalgi ang maong salapi daling gitawag sa bata ang tulo pa niya ka classmates ug nagpakuyog ngadto sa ilang maestra nga si Geraldine Nepomoceno aron ipahibalo ang iyang nakaplagan.

Tungod niini nagpanon silang miadto sa maong lugar ug dihang nakompirmar sa maong magtutudlo nga kwarta kini gidala nila kini diha sa ilang lawak-saringan ug gipahibalo ang prinsipal nga si Aurelia Kanseco.

 Lakip sa gipahibalo mao ang kapitan sa barangay nga si Floro Raboy ug mga kagawad aron iphon ang maong lima ka bandol nga kwarta nga tag P500 nga miabot ngadto sa P50 mil. Human niini ilaha kining gitugyan ngadto sa kapulisan.

Daling nakig-alayon ang kapulisan sa Badian sa kapulisan sa dakbayan sa Lapulapu ug ilang nahibaw-an nga ang usa ka nanag-iya og SPA sa maong siyudad nga biktima sa pagpanulis niadtong petsa 25 sa kaadlawon ang nanag-iya niini.

Sa dugang pakisusi sa kapulisan nahibaw-an nga usa ka Generacio Palagiosa, molupyo sa Badian nga kawani sa maong SPA ang suspek sa pagpanulis ug gituohang mipauli sa ilang lugar ug gitagoan sa kalibunan sa maong tunghaan ang maong kwarta. Si Palagiosa padayon pang gipangita.

Si Cebu Provincial Police Office director Sr. Supt. Erson Digal mapasalamaton ug midayeg sa gibuhat sa maong tinun-an tungod kay bisan sa kalinghod sa pangisip niini nakahuna-huna kini sa pag-uli sa maong kantidad ug maayong sundon alang sa uban.

Girekomendar karon ni Digal ngadto kang Cebu Gob. Gwendolyn Garcia ang maayong binuhatan sa maong bata aron kini mahatagan og igong pasidungog.

Butyag pa ni Digal nga dako ang ilang pagduda nga ang nakit-an nga kwarta lakip sa kwarta nga gikawat diha sa syudad sa Lapulapu nga nagkantidad og P3 milyones nga gipanag-iya sa usa ka Hapon. Matud pa ni Digal nga nakahuna-huna sila sa maong pagduda tungod kay usa sa mga suspetsado sa maong pagpanulis mao ang gwardiya nga si Palagiosa.

Midugang si Digal nga ang kapolisan sa Lapu-lapu nakig-alayon sa kapolisan sa Badian pagpangita sa suspetsado ug sa nadala niini nga kwarta.

Tuod man gihimo ni Digal nga usa ka modelo ang maong bata nga angayan nga sundon sa tanang tawo ug kapolisan sa pagkatalagsa-on niini nga kamaayo.  – BANAT NEWS