Tigbakay atbang sa police stn. way 'dakpan

CEBU, Philippines - Kapolisan sa barangay San Nicolas-Proper mironda sa gisumbong nga tigbakayan diha sa luyong bahin sa San Nicolas Sports Complex nga atbang sa San Nicolas Police Station apan bisan usa walay nadakpan kagahapon. Sa pakighinabi sa Banat News kang SPO1 Roger Sering, team leader sa miscellaneous team sa San Nicolas Police Station kini mibutyag nga nakadawat sila og tawag alas-2 sa hapon gikan sa usa ka concerned citizen ug misumbong nga adunay nahitabong tigbakay sa maong dapit. Tuod man dali nila kining giadto apan nakabantay ang mga sugarol ug daling nakaikyas hinungdan nga walay nadakpan ang ilang grupo. Tungod niini gipahimangnoan nalang ni Sering ang mga molupyo nga ilegal ang ilang gibuhat. Gihimakak usab ni Sering ang pasangil nga ilang gibutyag ngadto sa mga residente kun si kinsay misumbong kanila nga adunay tigbakay nga nahitabo sa maong lugar.

Matud pa niya aduna silay gisunod nga patakaran kabahin niini kini pagsigurong luwas ang mga concerned citizen nga mohatag og impormasyon kanila kabahin sa usa ka ilegal nga kalihukan nga ilang makit-an. Usa ka residente sa maong lugar ang mireklamong maoy gisulong sa mga manigbakay sa maong dapit kay giingong siya maoy gitumbok sa kapolisan nga maoy mipahibalo kabahin sa tigbakay.

Ang maong mireklamo mihimakak nga siya maoy misumbong niini sanglit sukad ma sukad pa wala siyay gisumbong sa mga kalihukan sa iyang mga silingan.

“Mag-care sad mi sa life sa callers, unya lisod kaayo og amo sad nga isulti tungod kay kami man ang madaot ana unya dili man sad na ensakto, wala man mi gisulti-an,” pasabot pa ni Sering.

Sumala pa ni Sering nga base sa ilang nadawat nga impormasyon nga ang maong lugar mopahigayon og lima ka adlaw nga aktibidades isip kabahin sa kasaulogan sa piyesta.  – BANAT NEWS