Ginang miinom pesticide

CEBU, Philippines - Usa ka ginang misuway pagpakamatay pinaagi sa pag-inom og pesticide apan suwerteng nakit-an sa iyang mga igsuon ug nadala sa tambalanan. Gikatahong naguol si Vilma Naranjo Abatayo, 26, human ang iyang bana mibiya kaniya ug wala na mobalik sa ilang gipuy-an sa sitio Bocawe, barangay Pamutan, bukirang bahin sa dakbayan sa Sugbo.

Sa pasiunang imbestigasyon ni SPO3 Rey Cuyos sa Homicide Section, si Vilma nakit-an sa mga igsuon niya nga nagbuwa na ang baba nga nanimahong pesticide.

Dali nilang gidala sa Cebu City Medical Center si Vilma.

Ang bana ni Vilma nga si Ronilo Abatayo Sr. mibiya niadtong Enero apan wala na mobalik. Sa laing bahin, namatay gyud ang aeronautic student human naghikog gumikan sa kaguol nga dili na makatiwas pagtungha. Ang patay nang nakit-an sa inahan ug igsoon alas 9 niadtong Martes sa gabii sa barangay West Poblacion, siyudad sa Naga mao si Julius Bascon Manalili, 20, ulitawo.

Matud ni PO2 Ken Cabrera sa Naga Police Station sa dihang nahinabi sa Banat News nga si Manalili namatikdan sa iyang inahan ug igsuon nga nagsige og hinuktok ug nagmagul-anon tungod kay ang amahan niini tulo na ka tuig nga wala magpadad-anan og suporta.

Subay sa inisyal nga imbestigasiyon, si Manalili misulod sa kwarto nianang pagkahapon ug nanirado. Sa pagka-gabii, wala kini mogawas sa panihapon hinungdan nga nakahukom ang inahan ug igsuon nga susihon apan wala gyud mangabli sa pultahan hinungdan nga gipugos nila og abli. Sa laing bahin, nagbitay nang naabtan sa anak ang iyang amahan nga nagbitay nga wala nay kinabuhi alas 8 sa miaging buntag sa barangay Tangil, lungsod sa Dumanjug.

Si Abraham Pastor Sr., 60, molupyo sa maong lugar nakit-an sa 12-anyos niyang anak nga lalaki nga nagbitay na.

Sa pakighinabi sa Banat News ni SPO1 Joselito Abella mibutyag kini nga sa wala pa maghikog ang amahan, nanugo kini sa iyang 12-anyos nga anak pagkuha sa usa ka pisi aron iyang gamiton.  (BANATNEWS)