6 Tulisan vs negosyante

CEBU, Philippines - Usa sa unom ka mga tulisan mitikangkang sa yuta ug gituohang kritikal ang kondisyon niini human pusila sa tag-iya sa tindahan nga ilang gitulis niadtong Martes sa gabii diha sa barangay Pooc, dakbayan sa Talisay.

Ang tindahan nga gisulod sa mga tulisan mao ang Yul General Merchandise nga nahimutang diha sa nahisgutang lugar ug gipanag-iya sa negosyanteng si Yul Julia, 46-anyos.

Si Supt. Henry Biñas, hepe sa Talisay City Police Station sa pakighinabi niini sa Banat News kagahapon nagkanayon nga ang mga tulisan nagsakay og tulo ka kolor itom nga motorsiklo kinsa nagpasangil nga mga kostumer.

Duha sa unom ka mga lalaki wala mosulod ngadto sa tindahan ug nagsilbeng look-out ug nagbantay sa gwardiya.

Matud niini nga gihulagway nga desente og pamarog ang mga tulisan ug giingong nangita sa kahera sa tindahan.

Ang upat miduol ngadto sa kahera ug mition og pusil ug gikuha ang halin nga P1,500.

Si Julia kinsa nakabantay na diha sa iyang opisina gipalong niini ang suga ug sa dihang mipaduol sa iyang nahimutangan ang nahisgutang upat ka tawo gipamusil niya kini gamit ang iyang kalibre .45 nga pistola nga lisensiyado.

Usa sa maong mga tulisan natumba gilayon ug duha kanila ang mibawos og pamusil ngadto kang Julia apan naka-cover ang naulahi sa kabinet diha sulod sa iyang buhatan hinungdan nga wala maigo sa mga bala.

Sa maong sitwasyon daling miikyas ang mga tulisan ug giyayongan ang ilang kauban nga naigo.

Matud ni Biñas nga nakig-coordinate sila karon sa Cebu City Police Office ug gisubay nila ang tanang mga duol nga tambalanan sa siyudad kung duna bay nagpa-admit nga napusilan.

Gibutyag usab niini nga duna na silay gisundang tawo nga ilang gituohang dunay kalambigitan sa hitabo.

Ug ilang gituohan nga ang maong mga tulisan grupo kini ug uban kanila taga dakbayan sa Talisay lang.

Gituohan usab nga sa wala pa mahitabo ang pagpanulis ang mga tulisan naniid na kini diha sa tindahan ni Julia.

Na-recover sa mga polis gikan sa lugar nga nahitaboan ang tulo ka kabhang sa bala sa kalibre .45 nga pistola, duha ka kabhang sa bala sa .9mm nga pistola ug usa ka slug sa kalibre .45 nga pistola. (BANATNEWS)