Jackie Chan mikomentaryo sa hostage crisis sa manila

CEBU, Philippines - Ang sikat nga aktor sa Hong Kong nga si Jackie Chan nagkanayon nga dili tanang taga Hong Kong naggamot og kasuko sa mga Pilipino gumikan sa kamatayon sa walo ka mga turistang taga Hong Kong human gi-hostage sa kanhi polis nga si Sr. Insp. Rolando Mendoza.

Ang mga Pilipino nga nanarbaho sa Hong Kong nangahadlok nga panimaslan tungod sa insidente. Sumala sa report, duha na ka Pilipino ang gitaktak sa ilang mga amo didto sa Hong Kong tungod sa kalagot sa hitabo.

Sumala pa sa report sa ANC nga si Chan mipadayag usab og kapikal sa nahitabo, apan midugang kini nga ang hostage crisis sa Manila mahimo usab nga mahitabo sa ubang nasud.

Ang Malacañang nagpasalamat sa pamahayag nga pakighigala sa Pilipinas gikan kang Chan.

Sa laing bahin, ang mga survivors sa hostage drama nanguli na sa Hong Kong uban ang mga patay’ng lawas sa walo nila ka kaubanang turista.

Usa sa samaran nga turista pabilin nga anaa sa intensive care unit sa Manila tungod sa kritikal nga kahimtang, samtang laing usa ang ilupad pinaagi sa medivac plane aron adto magpaalim sa ospital sa Hong Kong, si Hong Kong Undersecretary for Security T.K. Lai nagkanayon.

Gideklarar ni Pres. Benigno Simeon Aquino III ang tibuok adlaw kagahapon nga national day of mourning dungan sa Hong Kong, samtang nangayo siya og pasaylo sa mga pamilya sa mga turistang Hong Kong nationals ug sa gobyerno sa Hong Kong tungod sa hitabo.

Si Interior Secretary Jesse Robredo miangkong adunay mga lapso sa assault sa tourist bus nga gi-hostage ni Mendoza, apan dili siya maminaw sa panawagan kaniyang pag-resign isip kalihim sa Department of Interior and Local Government.

Si Aquino misaway sa coverage sa media ug nagtuo nga ang pagbalita sa pagdakop ni SPO2 Gregorio Mendoza maoy nakapalagot sa iyang igsuong hostage-taker ug didto nagsugod sa pagpamusil.

Ang Foreign Office sa Britanya miila sa duha ka hostage nga gi-release ni Mendoza nga mga British citizens.

Tulo sa mga nangamatay naghupot og Canadian citizenship. Ang ground commander sa hostage crisis nga si Manila Police District director Chief Supt. Rodolfo Magtibay mi-file og leave of absence samtang nagpadayon ang imbestigasyon.

Si Magtibay ang mimando sa SWAT sa Manila sa pag-assault sa tourist bus, sa dihang wala na maminaw si Mendoza sa hostage negotiator nga si Supt. Rolando Yebra ug Chief Insp. Romeo Salvador.

Si Aquino mipadala og delegasyon ngadto sa Hong Kong aron ipasabot ang insidente. Ang delegasyon gipanguluhan ni Bise Presidente Jejomar Binay.

Apan si Aquino nakapasabot na sa mga opisyal sa Hong Kong ug nakigpulong na sa ambassador sa China nganhi sa Pilipinas. (BANATNEWS)