CEBU, Philippines - Natuhab ang buko-buko sa usa ka tindero sa pungko-pungko human kini duslaka og kabilya sa iyang kontra didto sa Gotianoy Street, sa barangay Camputhaw ning siyudad sa Sugbo sa miaging gabii.
Ang biktima mao si Jerwin Lapas, 33, nga taga Dignos Compound sa barangay Lahug, samtang ang suspetsado mao usab si Arvie Miano, hingkod, nga usa ka dispatser.
Matud pa sa biktima nga samtang mitabang siya og tinda sa iyang amigo nga tag-iya og pungko-pungko kalit lang miabot ang suspetsado ug walay daghang estorya kalit lang giduslak ang iyang buko-buko sa kabilya nga dala niini.
Human mosirit ang daghang dugo gikan sa samad sa biktima miikyas dayon ang suspetsado samtang ang biktima daling gihatod ngadto sa Cebu City Medical Center.
Nasayran nga daan nang nagkabangi ang biktima ug ang suspetsado ug karon padayon pang gipangita sa kapolisan ang naulahi. (BANATNEWS)