Sakpan nag-lingam

CEBU, Philippines - Ang mga sakop sa Cebu City Anti-Indecency Board midakop kagahapon sa kaadlawon sa tag-iya og lingam massage apil na sa duha ka masahista human masakpi nga nag-“lingam” sa kinatawo sa pasyente niining lalaki.

Ang tag-iya (ngalan gipugngan subay sa kasugoan sa balaod) giapil sa pagdakop sa mga polis kay misuway pagbabag sa dihang dad-on na sa kapolisan ang iyang mga masahista (mga ngalan gipamugngan usab sa Banat News).

Ang duha ka masahista nga nag-edad og 18-anyos nasakpan nga nagtinabangay pag-lingam sa kinatawo sa lalaking naghigda sa katre nga walay bisan gamay’ng sapot sa lawas.

Ang mga sakop sa CAIB mi-inspeksiyon sa Authentic Lingam Massage diha sa dalan Tres Borces, Mabolo agi og pagtuman sa kamandoan ni Mayor Michael Rama.

Si CAIB chairperson Dr. Lucille Mercado miingon nga napugos pagdala ang mga polis sa walo ka laing masahista kay dili gyud sila mobuhi sa paggunit sa ilang mga kauban nga gidakop sa kapolisan. Gibuhian ra usab hinoon sila dayon.

Si Assistant City Prosecutor Aida Sanchez, sakop sa Cebu City Anti-Indecency Board, miingon nga daghang kaso ang ilang gipasaka batok sa mga dinakpan kagahapon.

Matud ni Sanchez nga siya mismo nakakita gyud human niya giwalis ang gamay’ng kurtina sa usa ka gamay’ng kwarto nga gi-lingam sa duha ka masahista ang kinatawo sa lalaki. Gawas ni prosecutor Sanchez, mga sakop sa media, mga kawani sa City Hall ug kapolisan nakasaksi sa law-ay nga buhat sulod sa massage room.

Gitataw ni prosecutor Sanchez nga nakalapas ang maong mga masahista sa lagda sa Presidential Decree 969 nga nagdili sa mga indecent nga kalihukan.

Ang dakbayan adunay ordinansa nga nagdili og physical contact sa kamot sa masahista ngadto sa pribadong parte sa lawas sa ilang pasyente.

Ang tag-iya sa massage parlor gikiha sa kapolisan tungod sa paglapas sa pipila ka lagda sa Human Trafficking Law nga gilatid sa Republic Act 9208.

Nasakpan usab sa mga sakop sa CAIB nga ang sanitary permit sa Authentic Lingam Massage mi-expire na kaniadtong Marso 13. Si Chief Insp. Chyrel Boniao, team leader sa Investigative and Detective Management Branch sa Cebu City Police Office nga mikuyog sa inspeksyon nagkanayon nga inspeksyon ra unta ang tuyo sa maong operasyon.

Ang tag-iya sa dihang gikahinabi sa mga tigbalita mihimakak nga malaw-ay ang serbisyong lingam ug mihulagway nga ‘purely harassment’ ra gyud ang gihimo batok kanila. Matud pa niini karong adlawa gikatakda ang public hearing sa siyudad kabahin sa pagtuki sa pag-regulate sa lingam massage sa dakbayan ug nagdudang gihimo lang ang operasyon aron adunay ikapresentar karong adlawa sa hearing.

Sumala pa niini nga kompleto sila sa permit ug ubang dokumento sa iyang negosyo. Nabalaka siya karon kun masirad-an ang iyang negosyo mawad-an og panginabuhian ang iyang kapin 50 ka masahista.

Samtang gipadayag ni Rama nga hingusgan pa sa siyudad ang paggukod sa mga massage parlor nga nagtanyag og imoralidad nga serbisyo.

Atol sa operasyon, lima ka massage parlor ang gibista sa mga awtoridad. (BANATNEWS)