Opisyal nga 'nanagpa' og reporter girelibuhan

CEBU, Philippines - Human makontrobersya ang hepe sa Homicide Section sa Cebu City Police Office (CCPO) nga nanagpa og babayeng reporter sa Banat News, girelibohan na sa iyang labaw sugod niadtong Biyernes apan kagahapon pa ang pormal nga turnover sa mipuli kaniya.

Kini ang gipahibawo ni Sr. Supt. Patrocinio Comendador, director sa kapulisan sa dakbayan nga iya nang gihulipan si Sr. Insp. Vicente Velasquez ug gibalhin ngadto sa Cebu City Public Safety Company (CCPSC) kanhi Service Security (SSG).

Ang hepe sa Parian Police Station nga si Sr. Insp. Zaldy Gokotano mao na karun ang hepe sa Homicide Section samtang ang gipuli kang Gokotano mao si Chief Insp. Alexis Relado.

Si Comendador mipasabot nga dili matawag og revamp iyang gihimo sanglit si Velasquez personal nga mihangyo kaniya nga mopabalhin sa laing buhatan.

Sumala pang Comendador nga napanglantawan ni Velasquez nga lisod nang mahibalik ang iyang reputasyon tungod sa daghang mga akusasyon ug aron usab mahibalik usab ang sitwasyon diha sa homicide section.

 “Wala koy ikasaway niya (Velasquez) bahin sa trabaho, kato ila (Lesley Caminade) ilang away personal…active and dedicated to his job si Velasquez,” pasabot pang Comendador.

Siya nidugang nga iya lang gyud gipaabot si Velasquez sa pagdesisyon ug dili usab siya gusto nga mag-low morale ang iyang mga sakop.

“Akong gihuwat nga siya modesisyon, kay di ko gusto nga low moral siya, kay abi unya niya wala nako siya suportahe,” dugang pang Comendador.

Nagkanayon si Comendador nga depende na sa hepe sa CCPSC nga si Supt. Eliseo Castronuevo kun unsay posisyon ni Velasquez sa maong buhatan. Si Velasquez hugtanong mihimakak sa alegasyon ni Lesley Caminade ug nangayo na og pasaylo kabahin sa hitabo.

Si Comendador miingon ang pagbutang ni Gokotano sa homicide section gipaagi gyud sa rekomendasyon ug consensus sa ubang mga polis diha sa CCPO.

Matud ni Comendador nga masuwayan gyud ang katakos ni Gokotano ilabi na kun dunay mga high profile case nga masugatan niini apan iyang gipasalig nga daghang magtinabangay kun dunay mga dagkong kaso sa dakbayan.  (BANATNEWS)