Multicab midaro sa merkado, 1 angol

CEBU, Philippines - Usa ka 23-anyos nga dalaga ang naangol ug duha ka traysikol nadaro usa niini mipilit sa bungbong sa merkado sa barangay Tabunok human usa ka pick-up multicab ang nawad-an og control ug midaro kanila kagahapon.

Nalandig sa tambalanan si Josephine Donaire, taga barangay Lawaan II, dakbayan sa Talisay human makaangkon og grabeng kadaot sa lawas dihang ang nahisgutang sakyanan nga nagtangag sa plakang JCD- 933 mibangga ngadto kaniya.

Ang drayber nga si Deogracias Heredia, 42, taga barangay Candulawan, dakbayan sa Talisay malinawong mitahan sa kapolisan human sa aksidente.

Si Donaire gidala ngadto sa Talisay City District Hospital apan tungod sa kahimtang niini gibalhin ngadto sa Vicente Sotto Memorial Medical Center.

Si Heredia midaro usab sa duha ka traysikol nga nagparada diha sa parking area nga gimaneho ni Johny Abranilla, 37, taga barangay Dumlog, Talisay ug Roberto Racaza, 52, taga barangay Cansojong, Talisay.

Si PO2 Amelito Hornales sa Talisay City Traffic Division sa pakighinabi niini sa Banat News kagahapon nagkanayon nga si Donaire naglakaw diha sa parking area samtang si Heredia nagmaniobra padulong mosulod sa maong parkingan.

Apan samtang nagmaniobra kalit nga mituratoy og dagan ang multicab ug napunggit si Donaire ug gidaro ang duha nga nag-parking nga traysikol ug gidasok kini didto sa bungbong.

Matud ni Hornales nga si Heredia mipasangil nga nasangit sa liston sa iyang sapatos ang gasolinador hinungdan nga wala siya makapreno ug milahos ang iyang sakyanan.

Ang polis natahap nga posibleng naratol si Heredia human mabanggai niini si Donaire hinungdan nga midaro na hinuon kini ngadto sa duha ka nahisgutang traysikol nga nagparada tungod kay naghuwat og pasahero.

Ang sakyanan ni Heredia diha moagi sa tunga nga bahin sa nahimutangan sa duha ka traysikol apan napabor ngadto sa traysikol ni Abranilla.

Ang traysikol ni Racaza natapsingan kini sa sakyanan apan nadaro gyud ug mipilit ngadto sa bungbong sa building sa merkado ang traysikol ni Abranilla.

Swerte tungod kay ang maong mga traysikol wala pay pasahero nga karga ug ang mga drayber niini nagpundo distansiya sa ilang mga traysikol ug wala pay naninda og mga sud-an diha sa lugar. (BANAT)