Pag-Ibig gitanyag

CEBU, Philippines - Higpit nga gipatuman sa Home Development Mutual Fund o Pag-Ibig ang balaod nga tanang mga trabahante nga nagdawat og gamay ug dagko nga suweldo kinahanglang magpa-miyembro sa Pag-Ibig.

Matud pa ni Rio R. Teves, Assistant Department Manager for Operations sa Pag-Ibig nga base sa Rule V sa implementing rules and regulations sa Republic Act No. 9679, kini nagbuot nga tanang trabahante sama sa drayber, katabang sa balay, hadenero, kusinero ug uban pang mga trabahante nga nagdawat lang bisan P1,000 nga suweldo, kinahanglang magpamiyembro gyud sa Pag-Ibig.

Kini aron pag-abot sa higayon makabaton sila og kaugalingong balay ug yuta pinaagi sa pag-aplay nila og housing loan sa Pag-Ibig.

Gumikan niini giawhag ni Teves ang tanang Sugboanon nga angay mopahimulos ning maong dakong kahigayonan nga gitanyag sa Pag-Ibig karon.

Midugang si Teves nga gawas sa housing loan, may short term loan usab ang Pag-Ibig. (BANAT)