School board gipatawag

CEBU, Philippines - Mipatawag si Gob. Gwendolyn Garcia og usa ka tigum sa mga miyembro sa Local School Board diha sa iyang buhatan niadtong nakalabay nga adlaw aron pagtuki sa nagkadaghang mga scholars sa probinsiya ug ang pagpalambo pa sa kahimtang sa edukasyon sa lalawigan.

Matud ni Garcia nga iyang gituki pag-ayo ang pagsulbong sa gidaghanon sa naka-qualify sa scholarship sa Kapitolyo gikan sa 50 sa miaging tuig ngadto na sa 280 karong tuiga.

Gikalipay hinuon sa gobernador ang maong kalamboan sanglit kini nagpasabot nga daghan na ang mga batan-ong nakapahimulos sa programa pang-edukasyon sa kagamhanan sa lalawigan. 

Giklaro sa gobernadora ang maong programa wala pay labot sa scholarship alang sa tanang mga valedictorians sa tanang mga public schools sa lalawigan sa Sugbu nga gihingusgan sa pagpatuman karong tuiga.

Gipahibawo usab sa gobernadora may tukoron ang kagamhanan sa lalawigan sa Sugbu nga 600 ka lawak saringan alang sa mga nagkadaiyang tunghaan sa high school samtang giplano na usab ang pagtukod og dugang 200 ka lawak saringan alang sa elementarya.

Samtang gipahibawo sa gobernadora nga karong Miyerkules pasidunggan ang mga 38 ka mograduar nga scholars sa probinsiya diin sila hatagan usab og insentibo sa matag malangkat nga honors.

Matud pa ni Garcia nga sa 38 ka mga magtutungha, pito kanila ang cum laude ug makadawat sila og P15,000 nga cash incentives samtang ang duha kanila nga magna cum laude makadawat og P20,000 cash incentives samtang ang suma cum laude makadawat og P30,000.

Si Garcia usab mitug-an usab nga lakip sa gitutukan karon ang restorasyon sa mga karaang 146 ka Gabaldon buildings nga giilang mga heritage buildings ilawom sa dibisyon sa DepEd sa lalawigan sa Sugbu. Ang Ramon Aboitiz Foundation Incorporated usa karon sa miabag sa lalawigan alang sa maong tinguha. Sa maong gidaghanon 28 niini ang napaayo na sa DepEd. (BANAT)