Mga 'Turko' pabayron na og buhis

CEBU, Philippines - Ang kagamhanan sa siyudad sa Sugbu mangolekta na og mga buluhisan ngadto sa mga Indian nationals nga mas nailhan sa tawag nga “Bombay” o ‘Turko’ nga tigpautang sa mga Sugbuanon.

Si Konsehal Nida Cabrera mipasar og resolusyon nga nag-awhag sa kagamhanan sa siyudad sa Sugbu pinaagi sa konseho nga mopanday og lokal nga balaudnon o ordinansa nga pabayron na og buhis ang maong mga langyaw’ng tigpautang.       

Matud pa ni Cabrera nga angayan lamang nga sila kolektahan og buhis sa siyudad sanglit dagko man usab kaayo ang gipangayo nilang interes sa ilang mga gipautang sama sa gihimo sa mga bangko.

Si Cabrera miingon nga dako kaayo ang makuhang pundo ang siyudad kun mapangayuan og buhis ang maong mga langyaw.

 Ang konsehal nagtuo nga dako na kaayo ang naginansiya sa maong mga Indian national kay dugay-dugay na man usab silang gipasagdang nagnegosyo niini dinhi sa Sugbu nga walay bayad-bayad sa buhis busa angayan gyud na nga pangayoan sila og buhis sa kagamhanan.

Sagad sa mga kustomer o mangutang sa maong mga langyaw mao ang mga gagmay’ng mga negosyante ilabi na diha sa mga aseras ug matag adlaw silang maningil sa bayad hangtud nga kini maimpas. Hinuon nasuta nga magdepende ra sa sabot-sabot kun pila ka porsiyento ang patong dunay 5-6 kun P5 bayran og P6 ug uban pa.

Gawas sa kwarta mopautang usab sila gikan sa kagamitan sa kusina hangtud na sa kutson sa kwarto ug inadlaw gihapon ang pagpaningil niini.

Bisan sila mga langyaw nga nakatabang sa mga ginagmay’ng negosyo, sumala pa sa mga vendors nga nahinabi sa Banat News nga nag-enjoy usab ang maong mga langyaw sa seguridad ug paggamit sa kadalanan nga gihatag sa gobiyerno susama sa ubang negosyanteng langyaw dinhi sa dakbayan busa makiangayon lang usab silang pabayron og buhis. (BANAT)