SRP billboard dili pamolitika - Osmeña

CEBU, Philippines - Kusganong gihimakak ni Cebu City South District Kongresista Tomas Osmeña nga gigamit niya ang pundo sa siyudad sa Sugbu dihang kini pa ang mayor alang sa pagpangdaot sa reputasyon sa lalawigan pinaagi sa mga billboards nga gipamutang diha sa South Road Properties.

Si Osmeña sa giduso nga counter affidavit ngadto sa Comelec may labot sa kasong gisang-at ni Gob. Gwendolyn Garcia sa wala pa ang eleksyon nagkanayon nga dili politikanhong katuyoan ang rason sa pagpabutang sa maong mga signages sa SRP.

Sumala pa niini wala siya’y nakitang kasaypanan nga gihimo sanglit igo ra siyang nagpahibawo sa publiko sa labot sa mga nahimo sa Kapitolyo.

Gihangyo ni Osmeña ang Comelec nga ibasura ang maong election protest sa gobernadora tungod kay wala kini igong basehanan.

Ang Comelec Cebu City office mohandos sa maong kaso ngadto sa ilang ulohang buhatan sa Manila sa higayon nga makaduso na og position paper ang habig ni Garcia ug ni Osmeña ug ang ilang labaw nga buhatan na ang modesisyon sa maong election protest. (BANAT)