Polis nga nakapatay gibalhin og laing unit

CEBU, Philippines - Girelibohan sugod kagahapong adlawa ang pulis nga nakapusil patay sa usa ka lalaking nakadunggab kaniya sa dihang mitubag siya og alarma niadtong Martes sa kaadlawon diha sa barangay Banilad ning dakbayan.

Si Sr. Supt. Patrocinio Comendador, director sa Cebu City Police Office mipabalhin ni PO2 Japeth Malima sa Cebu City Public Safety Company (CCPSC) kanhi Security Service Group (SSG) gikan sa Tourist Action Center (TAC).

Si Malima anaa pa nagpaalim sa Chung Hua Hospital human nahiagom og samad dinunggaban sa tiyan human siya dunggaba ni Ferdinand Inot kinsa iya usab napusilan ug napatay. Giingong miresponde sa alarma si Malima sa maong dapit apan dihang mipailang siya polis ug mipakita sa iyang ID giilog kini sa kauban sa iyang napatay.

Si Malima gipasakaan na og kasong homicide niadtong miaging adlaw apan giangkon sa mga sakop sa Homicide Section nga huyang ilang kasong gisang-at batok kang Malima sanglit walay mibarog nga saksi sa krimen.

Matud ni Comendador nga ila na sab gisugdan kagahapon ang pre-charge evaluation sa kasong administratiba nga atubangon ni Malima.

Nasayran ang mga kabanay ug ang nakasaksi nga nagdumili pag execute of affidavit mitug-an nga miluhod pa sa atubangan ni Malima si Inot ug nagpakiluoy nga dili siya pusilon kay duna siyay pamilya ug duha ka mga anak, apan giingong wala panumbalinga ni Malima ang maong pakiluoy ug gipusil kini ug gihurot gyud ang usa ka magazine sa iyang .9 mm hinungdan sa kamatayon ni Inot.

Matud ni Comendador ang pagbalhin kang Malima gituyo aron paglikay sa pagduda sa publiko ilabi na sa mga kabanay ni Inot nga dili sensiro ang ilang imbestigasyon. – BANAT NEWS