PDEA agent wala mangulata kay iyaha rang 'gigakos' ang biktima

CEBU, Philippines - Hugot nga gipanghimakak sa ahente sa Philippine Drug Enforcement Agency (PDEA)-7 ang pasangil nga pagpangulata ug pagpriso sa usa ka tinun-an sa 2nd year college sa kursong Criminology sa University of Cebu.

Si PDEA Agent 3 Mark Maramba mipatawag og press conference kagahapon sa sulod sa maong ahensya aron tubagon ang tanang pasangil ni Edgardo Martinez ,20, ug nangangkon nga wala niya kulataha kundili iyaha kining gigakos tungod kay kusgan ug nagkisikisi.

Lakip sa gipasanginlan ni Martinez nga miapil og kulata kaniya mao ang anak ni Thelma Chiong nga pangulo sa Crusade Against Violence (CAV) nga si Dennis Chiong nga giingong admin clerk sa National Bureau of Investigation (NBI)-7.

Apan si Maramba ug Chiong pulos mihimakak niini ug nagkanayon nga ang gibuhat ni Martinez maisip nga panimawos kaniya sanglit iya(Maramba) man kining gipasakaan og kasong direct assault.

Si Maramba mipasabot nga wala niya kulataha si Martinez ug iya lang kining gigakos uban sa mga interns kay labihang kusgana niadtong higayona ug nagtuo siyang ubos sa impluwensya sa ginadiling drugas.

Giangkon ni Maramba nga niadtong Agosto 4 gitawag ang iyang atensyon usa sa mga police intern nga mipahibawo sa gibuhat ni Martinez ug dihang iyang giadto sa intern office iyang gihikap ang abaga ni Martinez apan giingong kalit siya niining gisukmag sa walang dughan.

Matud pa ni Maramba wala mohunong pagsukmag kaniya si Martinez maong iyaha kining gigakos ug gumikan sa kakusgan niini mitabang na pagpugong ang ubang interns, nagtuo si Maramba kadtong mga bun-og ni Martinez nga gipakita sa media nakuha niini tungod sa pagtabang sa ubang interns.

Si Maramba nagdudang adunay mga estudyanteng dako ang kasuko kaniya ug maoy mipadako sa isyu ug mibutyag nga nakaila siya kanila.

Kahinumdoman si Martinez miatubang sa mga sakop sa media ug misaysay sa iyang gidangatan tungod sa gibuhat ni Maramba gumikan sa wala niya paghatag sa iyang school I.D sa police intern dihang nasakpan siyang nagsuot og ariyos.

Gipakita ni Martinez ang mga bun-og sa ibabaw’ng bahin sa wala niyang mata ug walang bahin sa iyang kilid gumikan sa pagyatak ni Maramba ug gipapriso siya niini sa Carbon Police station sulod sa tulo ka adlaw ug tulo ka gabii human siya gipasakaan ni Maramba og kasong direct assault hinungdan nadala siya sa Cebu City Jail ug napriso na pud og tulo ka adlaw ug upat kagabii.Nakagawas lang siya niadtong Agosto 11 sa hapon human siya gipiyansahan sa iyang igsuon og P12 mil.

Si PDEA-7 director Adrian Alvarino miingon nga dili konektado sa pagka-ahente ni Maramba sa PDEA ang nahitabo kay personal kini, apan ang paggamit sa pangalan sa PDEA dili niya mahimong palabyon hinungdan nga adunay imbestigasyon nga himuon batok kang Maramba. - BANAT NEWS