Tinun-an sa criminology gikulata sakop sa PDEA-7

CEBU, Philippines - Usa ka tinun-an sa kursong criminology mireklamong gikulata sa ahente sa Philippine Drug Enforcement Agency (PDEA-7) sulod sa tunghaan ug pagkahuman gipabilanggo kini sa Carbon Police Station.

Si Edgardo Martinez, 20, nagpuyo sa barangay Labangon, lumad nga taga Baliangao, Mizamiz Occidental ug 2nd year student sa kursong criminology sa University of Cebu (UC) mireklamo batok kang Agent 3 Mark Maramba sa PDEA-7.

Si Martinez nga miatubang kagahapon sa mga tigbalita misaysay nga niadtong Agosto 4 sa hapon pasado alas 4:30 paingon siya sa kasilyas sa maong tunghaan aron pagtubag sa sugo sa lawas.

Matud niya nga gisita siya sa usa ka intern sa criminology nga wala niya mailhi ang ngalan ug giingnan siyang tangtangon ang iyang ariyos sa iyang walang dunggan. Sa dihang iya nang nakuha ang ariyos, embarguhon unta iyang school ID, apan niya kini ihatag sa intern.

Tungod niadto, gituok siya sa intern ug gidala sulod sa intern office ug gipahibalo si Maramba.

Dugang pasangil ni Martinez nga sa dihang naabot si Maramba sa opisina, gisukmag dayon siya sa ulo niini, dayon giyakyatakan samtang nahagba na siya sa salog dayon miingon si Maramba “Wa ka kaila nako taga PDEA ko, ako pa jud imo gikakontra, commandant ko diri.”

Gihulga pa siyang ipa-expel ni Maramba samtang kini nagkasa-kasa sa iyang armas.

Iya usab gitug-an nga wala gyud siya malambigit o mag-apil-apil sa fraternity o gang.

Si Martinez nagkanayon nga gikuha ang iyang cellphone ug hangtod karon wala i-uli. Wala hinuon makahibalo si Martinez kinsa ang mikuha sa iyang cellphone sanglit niadtong higayona tulo ka intern sulod sa opisina ug ika-upat si Maramba.

Dugang pasangil ni Martinez nga si Maramba mitawag og polis sa Carbon Police Station ug didto siya gibilanggo sulod sa tulo ka adlaw ug tulo ka gabii human siya gikasohan ni Maramba og direct assault nga maoy hinungdan nga nadala gyud siya sa Cebu City Jail diin nabilanggo siya didto og tulo ka adlaw ug upat ka gabii.

Nakagawas siya sa Cebu City Jail niadtong Agosto 11 sa alas 2 sa hapon human siya gipiyansahan og P12 mil sa iyang igsuon. Si Martinez nagpa-blotter kagahapon sa udto sa buhatan sa City Investigation and Detective Management Branch (CIDMB) sanglit nahadlok siya sa iyang seguridad human siya bahari ni Maramba.

Si Martinez miingong mopasaka gyud siya og kaso batok kang Maramba aron wala nay laing estudyante nga masusama unya ang nadangatan kaniya. Si Atty. Mauro Licen, deputy regional director sa PDEA-7 namayahag nga ilang ipaubos sa imbestigasyon si Maramba ug kun mamatud-ang nakahimo kini og kalapasan ilang iduso ang resulta sa PDEA-Manila.

Matud ni Licen ang paggamit ni Maramba sa ngalan sa ilang ahensya dili nila i-tolerate. Si Maramba nga kuhaan unta og reaksyon labot sa pasangil apan napakyas ang mga sakop sa media kay matud pa sa iyang mga kauban mitambong kini og court hearing kagahapon sa lungsod sa Oslob.

Apan nagpadala og text message sa usa sa mga reporter si Maramba nga nagkanayon “Naa pa ko hearing. Text lang ko. Ambot ngano inyong gidaginot.”

Laing text nga gipadala ni Maramba “what assurance imong mahatag nga dili mo biased? Kay murag lingaw kaayo mo segig duot nako. Inamigo ni nga hangyo kay dugay man kaha ta kuyog simbahan.  – BANAT NEWS