English ipatudlo gyud

CEBU, Philippines - Pinulongang English giduso ni 1st District Kongresista Eduardo Gullas pinaagi sa iyang duha ka bill nga higpit itudlo ngadto sa mga tinun-an sa elementarya ug high school.

Ang duha ka balaudnon ni Gullas iyang giduso atol sa 14th Congress niadtong Miyerkules nga mao ang House Bill 93 o English Bill kon “Strengthening and Enhancing the Use of English as a Medium of Instruction in Philippines Schools Act.”

Matud niini nga ang maong bill naduso ug naaprobahan na kini sa Kongreso niadtong 13th Congress ug napadala na ngadto sa Senado apan naabtan sa pagsira sa kongreso.

Nakalatid sa maong bill nga gikan sa prep ngadto sa grade three English ug Filipino o regional language ang gamiton sa pagtudlo. Ang regional language buot pasabot ang lumad nga pinulongan sa usa ka lugar.

Gikan sa grade four ngadto sa high school, English maoy gamiton sa pagtudlo diha sa mga tunghaan.

Matud sa Kongresista nga sa 238 ka mga Kongresista 217 lakip niya ang mi-co-author sa maong bill ug naaprubahan na sa Committee on Basic Education, Committee on Technical and Higher Education ug sa Committee on Appropriation ug Rules Committee sa Kongreso ug sa Plenaryo.

Apan wala sila maka-sponsor sa measure sa plenaryo sa maong bill tungod kay dunay mga Kongresista nga mikwestiyon sa quorum tungod kay gustong ang Tagalog maoy gamiton sa pagtudlo sa mga tunghaan hinungdan nga ang bill wala gyud maaprobahi.

Ang tanang Kongresista gikan sa walo ka rehiyon nga mao ang I, IV-B, V, VII, VIII, XI, XV ug Autonomous Region of Muslim Mindanao (ARMM) ug mga partilista ang mipirma sa maong bill. – BANAT NEWS