'Mikamang' sa asawa sa higala gipatay

CEBU, Philippines - Giunay og patay sa iyang higala ang usa ka mananagat nga iyang gipasanginlan nga nangamang sa iyang asawa samtang ang biktima didto nakatulog sa ilang pinuy-anan tungod sa kahubog sa sitio Dunggoan barangay Cawayan sa lungsod sa Dalaguete niadtong Miyerkules sa alas 3:30 sa hapon.

Ang biktima mao si Richard Beltran, 26, molupyo sa sitio Biasong barangay Lanao, Dalaguete samtang ang suspek mao si Ericson Carin Acedo, 41, nagpuyo sa maong lugar ug higala sa biktima.

Matud ni PO2 Godofredo Glipa sa Dalaguete Police Station dihang nahinabi sa Banat News mibutyag nga pwerteng huboga sa biktima human makig-inom sa suspek maong diha na kini pakatulga sa balay sa naulahi.

Apan nianang pagkabuntag napalgang patay na ug may samad dinunggaban sa liog ang biktima nga nag-ubo sa iyang gihigdaan.

Subay sa gihimong dugang pakisusi sa kapulisan gikan sa asawa sa suspek kansang pangalan wala makuha sa kapolisan nga nag-selos ang iyang bana human niya tug-ani nga gikamang siya sa biktima nianang sayo sa buntag samtang natulog pa ang suspek.

Sa paghimo ning balita padayun pa ang hot pursuit operation sa kapulisan pagsikop sa suspek nga daling nakasibat pahilayo human sa hitabo.  – BANAT NEWS