Pamilyang Davide wa matandog sa mga saway

CEBU, Philippines - Wala matandog ang pamilyang Davide sa pagsaway ni Senador Jinggoy Estrada kang kanhi Supreme Court chief justice Hilario Davide Jr. pinaagi sa privilege speech sa hawanan sa Senado niadtong Martes.

Sa samang bahin, si Mayor Michael Rama mipadayag sa wala niya pag-uyon sa walay puas nga pagpanaway ni Estrada sa kanhi chief justice.

Matud pa ni kanhi Konsehal Hilario ‘Junjun’ Davide III nga wala nay epekto alang kanila ang padayong pagsaway ni Estrada sa iyang amahan tungod kay nasayod sila nga wala pa gyud makalimot ang senador sa pagkatangtang sa iyang amahan nga si kanhi presidente Joseph Estrada.

Ang batan-ong Davide nagkanayon nga dili na nila bag-o ang pagkwestyon ni Sen. Estrada sa pagkapangulo sa iyang amahan sa Truth Commission nga gitukod ni Presidente Benigno Simeon Aquino III kay ang iyang amahan man ang nagpahurar kang kanhi presidente Gloria Arroyo nga mihulip ni Estrada.

Sumala pa ni Davide nga sayod siya nga bisan og giunsa pa ang pagsulay og guba ni Sen. Estrada ang iyang amahan wala gihapon kini makatandog sa kridibilidad sa iyang amahan sanglit misalig man ang katawhan sa kaligdong ug katakus sa kanhi chief justice paghupot sa iyang katungdanan.

Gitumbok ni Davide nga ang pagkuwestyon ni Sen. Estrada dili panumbalingon sa iyang amahan kay sayod kini nga may dakong kalagot ang mga Estrada ug may politikanhong interes ang pagpanaot sa senador batok sa iyang amahan.

Si Rama sa iyang bahin miingon nga dili makiangayon ang gibuhat ni Estrada pagpanamastamas sa usa ka Sugboanon kay usa ka pagdaot sa dungog.

Dugang pa sa mayor nga iyang itugyan sa Cebu City Council ang desisyon kun ila bang ideklarar nga “persona non grata” si Estrada dinhi sa Sugbo.  - Gloribee M. Aroma (BANAT NEWS)