CEBU, Philippines - Si Mayor Paz Radaza sa dakbayan sa Lapulapu nabalaka sa impormasyon nga iyang nadawat nga anaa sa isla sa Mactan ang recruitment ug training sa mga gun-for-hire.
Matud pa ni Radaza iya nang gipahibalo si Lapulapu City Police Office director Sr. Supt. Mariano Natu-el Jr. ug ang hepe sa Intelligence Section sa kapolisan nga si Insp. Antonio Detuya alang sa dinaliang aksiyon niini.
Base sa sulat ni Radaza ngadto sa kapolisan niadtong Agosto 17, adunay impormasyon nga naabot sa Office of the Mayor nga anaa sa pipila ka barangay sa dakbayan sa Lapulapu magtagotago ang mga hired killers ug nang-recruit ug nagbansaybansay kini sa mga sakop niini.
Gitumbok ni Radaza ang barangay Canjulao, Basak ug Babag nga posibleng nahimutang sa sindikato sa mga gun-for-hire.
Gipamatud-an ni Radaza ang iyang pagtuo pinaagi sa mga krimen nga nahitabo sa Metro Cebu nga pagpamanhig sa mga negosyante diin ang mga suspetsado gikan sa Lapulapu.
Gumikan niini, si Radaza mimando sa LCPO sa pag-ila ug pagsumpo sa sindikato.
Ang kagamhanang lokal andam mosuporta sa kapolisan sa pagpuhag sa maong sindikato.
Si Natu-el sa iyang bahin nagkanayon nga misusi na ang kapolisan sa impormasyon nga nadawat ni Radaza. Gani, dili lang ang LCPO ang nag-monitor sa kalihukan sa mga hired killers, lakip na ang ubang unit.
Matud pa ni Radaza kinahanglan masumpo sa labing daling panahon ang sindikato gumikan kay dili siya buot nga ang dakbayan maoy gigikanan sa mga kriminal nga malambigit sa mga bayolenteng kalihukan. – BANAT NEWS