Polis nakapatay

CEBU, Philippines - Usa ka polis nga mitubag og alarma nakapusil patay human siya gitabangan og kulata ug gidunggab hinungdan sa pagkalandig niini sa tambalanan kagahapon sa kaadlawon diha sa dalan J. Panes, Banilad Road, Kasambagan ning dakbayan sa Sugbo.

Ang napusilan patay mao si Ferdinand Inot 38, minyo, glass installer sa Value Builders, taga sitio Mojon 2, Banilad ning siyudad.

Samtang ang polis nga nakapusil kang Inot, ug nadunggaban sa iyang tiyan ug anaa karon sa Chong Hua Hospital mao si PO2 Japeth Malima, nadestino sa Tourist Action Center (TAC) sa Cebu City Police Office.

Sa pasiunang imbestigasyon ni SPO4 Alex Dacua ug mga kaubanan sa Homicide Section sa CCPO nagbutyag nga mitubag og alarma si PO2 Malima sa maong lugar human dunay babaye nga nangayo og tabang kaniya.Dugang pakisusi sa kapolisan, si Edwin Lastimoso, 36, ulitawo, panday ug nagpuyo sa maong lugar mialegar nga siya ug iyang mga higala nga si Tony Bacalso lakip na si Inot nag-inom sa usa ka tindahan daplin sa karsada.

Si PO2 Malima nagpaila nga polis dungan sa pagpakita sa iyang I.D sa PNP ug giingong gikuha ni Lastimoso ug wala na gibalik ngadto sa polis

Si PO2 Malima sa iyang bahin nagkanayon nga niresponde siya sa dapit tungod sa trouble alarm apan kalit lang nidasmag kaniya si Inot kinsa niadtong higayona nagbitbit og mahait nga hinagiban dayon dunggab kaniya sa tiyan.Si PO2 Malima bisan samaran na, daling mibunot sa iyang 9mm service firearm nga giluklok   sa   hawakan ug gipusil si Inot sa makadaghang higayon ug naigo sa nagkadaiyang bahin sa iyang kalawasan nga maoy gituohan nga nakaingon sa hinanaling kamatayon.

Ang mga sakop sa Crime Scene Investigation (CSI) ug Homicide Section nakarekober sa dapit og usa ka .9mm Berretta, usa ka empty magazine sa 9mm, walo ka empty shells sa bala sa 9mm, tulo ka buhing bala ug PNP I.D.Si PO2 Malima boluntaryong mitahan sa iyang labaw nga si Sr. Insp. Stanley Sabang diin siya daling gihatod sa Chong Hua Hospital tungod sa dinunggaban nga naangkon niini apan gikataho nga anaa na sa luwas nga kahimtang ang maong polis.

Si PO2 Malima gikatahong pasakaan og kasong homicide human ang asawa sa iyang napusilan patay mopasaka gyud og sumbong batok kaniya.

Si Sr. Supt. Patrocinio Comendador, hepe sa kapolisan sa dakbayan sa Sugbo nagkanayon ipaubos   sa imbestigasyon si PO2 Malima bisan kun nadunggaban pa siya aron masuta unsay tinuod nga nahitabo nga napusilan niya si Inot.Matud ni Comendador nga lihitimo nga operasyon ang gihimo ni PO2 Malima sanglit bisan off-duty siya mitubag gihapon og alarma tungod sa pagpangayo og panabang sa usa ka babaye.Apan bisan paman niini si PO2 Malima kasamtangan unang ikustodiya sa Homicide Section hangtud mahuman ang imbestigasyon. – BANAT NEWS