Karnaper naratol nasikop

CEBU, Philippines - Gidimalas ang usa ka 27 anyos nga estambay dihang pagpadagan niya sa kinarnap niyang motorsiklo natumba, busa naapsan siya sa mga naggukod ug nadakpan siya didto sa Cabahug Street, barangay Ibabao, dakbayan sa Mandaue kagahapon sa udto.

Giila ang suspetsado nga si Geraldo Amores ,27, minyo ug walay trabaho nga taga Sta. Rosa, syudad sa Lapu-lapu, samtang ang motorsiklong gikawat niya gipanag-iya ni Jonathan Rosaoro, 30, minyo, nga taga Cabahug Street, syudad sa Mandaue.

Sa imbistigasyon sa kapolisan sa dakbayan sa Mandaue , nasayran nga milipot sa likod sa balay sa biktima ang suspetsado kay mipasangil nga mangihi .

Apan mao nalay namatngonan sa mga silingan nga gisakyan na sa suspetsado ang motorsiklo sa biktima dayong pasirit og padagan niini.

Diha-diha gigukod dayon sa mga silingan ang biktima ug gumikan sa pagkaratol niini, na-slide ang motorsiklo busa naligid ug nabalintong siya sa karsada hinungdan nga dali ra kaayo siyang nasikop.

Gihatod dayon ngadto sa kapolisan sa Mandaue diin tua siya karon ibalhog samtang giatubang ang kasong carnapping. – BANAT NEWS