Talisay di na patukoro'g subdivision

CEBU, Philippines - Usa ka engineer misugyot sa kagamhanan sa dakbayan sa Talisay nga hunongon niini ang pagpanukod og mga subdivision sa maong lugar ug mosentro sila sa pagpangayo sa ilang mga imbornal ug pagpaanindot sa mga baybayon aron ang mga investor ug mga turista madani sa pagtukod og patigayon sa maong siyudad.

Sa gipahigayong tigom sa milabay’ng adlaw didto sa buhatan ni Kongresista Eduardo Gullas sa University of the Visayas, sa dakbayan sa Sugbo si Engineer Pedro Adonis Compendio, consultant sa SPACE System.4719 maoy mihimo ning maong sugyot.

Matud pa ni Compendio nga ang Talisay dako kaayo og suliran bahin sa iyang sistema sa imbornal nga maoy hinungdan nga inig bundak sa kusog nga uwan, lunopan dayon ang kasagarang mga patag nga bahin sa maong dakbayan.

Busa kun dili kini tagdon sa kagamhanan sa dakbayan, maglisod pagsulbong ang ekonomiya sa maong lugar, matud pa niya.

Ang SPACESystem.4719 usa ka buhatan nga tiggama og plano bahin sa drainage nga gikontrato sa kagamhanan sa Talisay aron mopahigayon og pagtuon alang sa pagmontar og master plan sa sistema sa imbornal sa dakbayan .

Mokabat sa P100 milyones ang pundong gikinahanglan sa maong proyekto. Gumikan kay wala pay pundo ang dakbayan alang sa maong proyekto, mopagawas lang una kini og P5 milyones aron masugdan ang proyekto.

Si Compendio nagkanayon nga unahon nila ang paghimo sa plano alang sa barangay Bulacao, kay usa kini sa labing lunopanan sa panahon nga mobundak ang uwan.

Gawas sa barangay Bulacao, lunopanan usab ang mga barangay Tabunok, Lagtang, Poblacion ug Cansojong.

Kini nagumikan sa kakuwang sa mga imbornal sa maong lugar busa nagkinahanglan   kini og dinaliang lakang, matud pa ni Compendio.

Si Kongresista Gullas nga namati kang Compendio nagkanayon nga kinahanglang kahimoan dayon og lakang kining dakong suliran sa Talisay bahin sa iyang drainage system. Ang Kongresista dili motuo nga walay pundo ang Talisay tungod kay gawas nga nagdawatan kini og tag P300 milyones nga internal revenue allotment (IRA), may kinitaan kining mokabat og P100 milyones matag tuig.

Midugang si Gullas nga wala lang gyud makat-oni sa mga opisyal sa Talisay ang paglantaw kun unsay mga proyektong angayang hatagan og unang pagtagad diha aron mosulbong ang ekonomiya niini. – BANAT NEWS