CEBU, Philippines - Si Mayor Paz Radaza sa dakbayan sa Lapulapu ug Mayor Jonas Cortes sa dakbayan sa Mandaue dakong supak sa gisugyot nga wagtangon ang Sanguniang Kabataan (SK.)
Matud ni Radaza nga aktibo kaayo sa mga kalihukan nga naghatag og kaayohan sa mga batan-on sa dakbayan ang mga sakop sa SK sa Lapulapu busa iya kining gisuportahan.
Hinuon matud pa niya nga dili kalikayan nga may mga sakop usab sa SK nga wala kaayo makaatiman sa ilang katungdanan tungod kay giuna nila ang ilang pag-eskuyla.
Apan supak siya nga wagtangon ang SK nga maoy nagrepresentar sa sector sa mga batan-on diha sa konseho sa dakbayan.
Samtang si Cortes susama usab sa baruganan ni Radaza nga nagkanayon nga kinahanglang ipabilin ang tingog sa mga batan-on diha sa konseho sa dakbayan.
Matud pa ni Cortes nga pinaagi sa mga proyekto nga gipasiugdahan sa mga batan-on diha sa kabarangayan, malikay ang kadaghanan kanila gikan sa mga dautang bisyo ilabi na sa paggamit sa ginadiling drugas.
Sa Mandaue kasagaran sa SK aktibo kaayo sa mga programa nga may labot sa paugnat sa kusog, matud pa ni Cortes.
Gawas niini aktibo usab sila sa pagpreserbar sa kalikopan busa daghan kaayo ang mabuhat sa mga batan-on nga ikaandam kanila alang sa maayong kaugmaon.
Miingon si Cortes nga pinaagi sa pag-umol sa mahuyang nga kaisipan sa mga batan-on ngadto sa mga hamtong nang gimbuhaton sa katilingban, makakat-on sila sa hustong liderato alang sa kaayohan sa mga batan-on ugma damlag
Busa ang pagwagtang sa SK, sama ra nga giwagtangan og maayong giya sa kaugmaon ang mga batan-on, sumala ni Cortes. – BANAT NEWS