CEBU, Philippines - Gisuportahan ni Cebu City South District Kong. Tomas Osmeña ang baruganan ni Mayor Michael Rama pag-ingong walay katungod si Gob. Gwendolyn Garcia pagbutang og kondisyon kun gusto niining mahinayon ang negosasyon sa city hall ug lalawigan pagsulbad sa problema sa 93-1 lot. Matud pa sa tigpamaba ni Osmeña nga si kanhi city administrator Francisco Bimbo Fernandez nga kun gusto ang Kapitolyo nga makig-negotiate modiretso na unta kini sa negotiating table ug anha pa hisgutan ang mga kondisyones.
Giangkon ni Fernandez nga wala sila makauyon sa gipangayong kondisyon ni Garcia usa na niini mao ang pagpatangtang sa billboards sa South Road Properties (SRP) nga gihulagway sa gobernadora nga nag-insulto sa kagamhanan sa lalawigan sa Sugbu.
Kini tungod kay matag adlaw mapun-an ang isitar sa gobernadora nga kondisyon ug posibleng magkadaghan pa kini hangtud nga walay mahitabong negosasyon.
“Sugdan una nato ang sabut-sabut, unya na ang mga kondisyones. Mag-estorya una ta aron maundang ang away,” sigon pa ni Fernandez sa interbyu sa DyRF. – BANAT NEWS