Biktima ni Joavan patestiguhon

CEBU, Philippines - Ang korte mipagawas og subpoena alang sa duha ka mga biktima sa giingong pagpamun-og sa anak sa mayor sa siyudad sa Talisay nga si Joavan Fernandez.

Kini aron hatagan og kahigayunan nga makatestigos sa korte kalabot sa pagdagit og pagpamun-og ni Joavan Fernandez sa duha ka mga batan-ong trabahante sa vulcanizing sa Tabunok, Talisay City niadtong miaging tuig.

Si RTC-7 branch 24 Judge Olegario Sarmiento Jr. mipadala og subpoena alang kang Oscar ug Winston Abellana aron maoy mamahimong testigos sa prosecution karong Septiyembre 20, 2010.

Ang maong subpoena gipaagi kini sa Regional State Prosecutor sanglit ubos na man sa witness protection program ang amahan ug anak nga Abellana.

Ang maong kaso bag-ohay lang napunta sa sala ni Sarmiento human si RTC-7 branch 22 Manuel Patalingjug ang mi-inhibit sa maong kaso.

Nasayran nga si Joavan Fernandez nag-atubang og kasong serious illegal detention ug physical injuries nga giduso sa duha ka vulcanizing shop workers nga sila si Winston ug sa ig-agaw niini nga Osbert tungod sa giingong pagkawat nila sa ligid sa sakyanan ni Mayor Socrates Fernandez niadtong Agosto 11 sa miaging tuig.

Ang duha giingong gidala ni Joavan sa barangay Bulacao ug gikulata, gipuspusan sa armas ug gihulgang patyon.

Si Osbert Abellana una nang misibog sa maong kaso pinaagi sa pagpirma og affidavit of desistance apan nagpabilin si Winston ug ang amahan niini nga si Oscar Abellana nga anaa karon sa ubos sa witness protection program sa Department of Justice. – BANAT NEWS