Koreano nag-wild sulod sa hotel

CEBU, Philippines - Koreano gisikop sa mga sakop sa Tourist Police sa dakbayan sa Lapulapu kay nag-wild sulod sa usa ka hotel sa maong dakbayan sa milabay’ng hapon.

Ang gisikop mao si Arnold Lim, kasamtangan nagpuyo sa Bellavista Hotel sa barangay Pusok, dakbayan sa Lapulapu.

Sa imbestigasyon ni PO1 Maximo Villagonzalo sa Tourist Police, nasayran nga alas 4 sa milabay’ng hapon mitawag kanila ang hotel attendant sa Bellavista Hotel nga si Mary Hope Daitol ug nagpahibalo nga dunay usa ka Koreano nga nag-wild sa maong hotel.

Atol sa pagresponde sa kapolisan naabtan pa niini ang mga carpet sa lawak sa Koreano nga nangagisi gumikan sa paghuramentado niini.

Si Lim nagdumili sa pagbayad sa kantidad nga 500 dolyares mugna sa danyos nga nahimo sa iyang pag-wild.

Gumikan niini, gidala kini sa Lapulapu Police Station ug kasamtangang gibilanggo.

Nagduda nga dako og problema ang maong Koreano gumikan kay dili kini hubog sa dihang nag-wild.

Pipila ka gutlo, nakahukom si Lim nga mobayad na lang sa iyang obligasyon sa maong hotel tungod sa danyos nga iyang nahimo. Human makabayad sa 500 dolyares si Lim gibuhian kini sa kapolisan nga anaa sa maayong kondisyon sa kalawasan. – BANAT NEWS