3 ka armado namusil; 2 patay

CEBU, Philippines - Duha ang patay ug laing usa ang samaran human gipamusil sa tulo ka armadong mga lalaki kagahapon alas 3 sa kaadlawon sa sitio Sampaguita, Villagonzalo 2, barangay Tejero ning siyudad.

Ang duha ka patay’ng lawas nagkabulag diin ang usa nga wala pa mailhi maoy unang nakit-an sa kapolisan sa crime scene samtang ang ikaduhang patay’ng lawas nakit-an pasado na alas 5 sa gilay-ong 30 metros gikan sa gihagbaan sa usa ka biktima.

Sa pagsulat ning balita, wala pa mailhi sa kapolisan sa dakbayan ang usa sa duha nga namatay sa pagpamusil samtang anaa karon gipahiluna sa usa ka punerarya dinhi sa Sugbo.

Ang patay nga wala pa mailhi gihulagway nga hingkod ang pangidaron, nagsul-ob kolor pulang T-shirt, blue nga shortpants, nagkalo, nagsul-ob itom nga tsinelas, dunay patik sa iyang dughan nga pangalang ‘Jorie Cañete’ ug laing usa diha sa tuong batiis nga dunay pangalang “Delio Betcher.”

Samtang ang ikaduhang namatay nailhang si Christopher Pundar “alias” Molong, 25, construction worker nga taga sitio Tarcom, barangay Lahug ug naangol usab ang iyang ig-agaw nga si Rolando Niñal, 20, habal-habal driver ug silingan ni Pundar. Subay sa pasiunang imbestigasyon sa Homicide Section nagbutyag nga tulo ka wala mailhing lalaki pulos armado .45 nga kalibre sa armas nagsul-ob og silver nga bracelet gibanabanang nagpangidaron og 19 ngadto sa 22 anyos gitumbok nga namusil kaniya.

Si Niñal nakaangkon og samad pinusilan sa walang bukton ug daling misibat palayo sa lugar ug mipara og taxi ug nagpahatod sa Fuente Police Station ug nangayog tabang sa kapolisan aron magpahatod sa Cebu City Medical Center (CCMC).

Ang kapolisan padayon pa sa ilang imbestigasyon aron mailhan ang tulo ka lalaking namusil.

Si Niñal nagtuo nga kadtong napatay nga wala mailhi ang tuyo sa pamusil, apan napagan lamang siya ug ang iyang ig-agaw nga namatay.  – BANAT NEWS