Ipamilin nga butang sa mga vendors sakmiton

CEBU, Philippines - Sugdan na karong Agosto 23 ang pagpanghipos sa mga butang sa sidewalk vendors nga makabalda sa kadalanan nga biyaan o tabunan lang sa mga vendors diha sa sidewalk inig kahuman nila og paninda kun molapas na og alas-11 sa gabii.

Matud pa sa hepe sa Squatters Prevention Encroachment and Elimination Division (SPEED) nga si Noel Artes nga ilang nabantayan nga inig kahuman og baligya sa mga sidewalk vendors , pipila niini ipamilin lang ang ilang mga butang sa kadalanan sama sa lamesa, bangko ug uban pa hinungdan nababagan na hinuon ang mga agianan sa mga tawo.

 Dugang pa niya nga himuon nila nga pilot area sa ilang operasyon mao ang dalan Colon sanglit nagbaha sa maong dapit ang mga sidewalk vendors.

“Dunay uban, nga inig kahuman nila og baligya, koralan nila ang ilang nga butang, ang mahitabo kay maglisod na hinuon og agi ang mga tawo,” saysay pa ni Artes dinhi sa Banat News. Matud pa ni Artes nga ila gyud nga kuhaon ang mga butang kung makabalda kini sa kadalanan partikular na nga kung dili mosunod sa gipatuman nila nga one-side vending nga ilang gisugdan sa miaging buwan. – BANAT NEWS