Kotse mibangga sa lubi kay nawad-an og preno

CEBU, Philippines - Maayong pagkagusbat sa usa ka kotse human kini mibangga sa punoan sa lubi ug waiting shed sa dihang nawad-an og kontrol pagkawala sa preno niini pasado alas 9 sa miaging gabii sa barangay Bahay, lungsod sa Sibonga.

Ang mga samaran mao sila si Ringo Rizada, 40, Lemuel Ybo, 42, Crisologo Dacay, 50, pulos molupyo sa nahisgutang lugar ug Danny Rubia, 50, molupyo sa barangay Poblacion, lungsod sa Argao.

Sa pakighinabi sa Banat News ni PO3 Antonio Sanchez, imbestigador sa Sibonga Police Station, mibutyag kini nga si Rizada ang nagmaneho sa Honda Civic (GFJ-818) paingon sa ilang panimalay.

Sa dihang naabot sa nahisgutang lugar, nakabantay si Rizada nga nawad-an siya og kontrol sa kotse hinungdan nga gibangga kini ngadto sa punoan sa lubi sa daplin sa karsada ug milahos kini pagkapasok ngadto sa waiting shed.

Tungod sa maong hitabo, nakaangkon og grabeng samad sa kalawasan ug ulo ang upat ka biktima ug dali kining gidala sa Deiparine Medical Clinic ug gibalhin usab dayon kini ngadto sa South General Hospital.

Gihulagway ni PO3 Sanchez nga posibleng sa kakusog sa pagpadagan ni Rizada nawad-an og kontrol.

Matud pa ni PO3 Sanchez nga posibleng nagtuo si Rizada nga tungod sa kalalom na sa kagabhion mahimo na niining magpakusog sa pagpadagan ug sa kakusog niini, nawala ang preno niini.Samtang mibutyag usab si PO3 Sanchez nga kun sa adlaw pa nahitabo ang aksidente, aduna gayoy mamatay tungod sa kakusog sa impak sa pagkapasok sa kotse ngadto sa waiting shed nga kasagarang estambayan sa pipila ka tawo sa barangay. (BANATNEWS)