Balaod sa SK ipausab

CEBU, Philippines - Si Gobernador Gwen Garcia mitumbok nga angayang usbon ang batakang balaod nga nagsagop sa Sanguniang Kabataan (SK) nga kinahanglang graduwado sa college ang mapiling chairman sa SK federation.

Sa samang higayon si Garcia miingon nga dili siya uyon nga wagtangon ang SK election tungod kay ang kinabag-an sa populasyon sa lalawigan sa Sugbo mga batan-on, busa haum lamang nga hatagan og representasyon ang hugpong sa mga kabatan-onan.

Apan si Garcia nasagmuyo pag-ayo sa pipila ka mga napiling mga chairman sa SK nga nagpangidaron pa og 15 anyos, kinsa walay hingpit nga kaalam ug kasinatian sa pagpanday og ordinansa sanglit tua man kini kanunay sa eskuylahan.

Ang gobernadora nagkanayon nga mas maayo unta nga iapil sa kausaban sa balaod sa SK nga ang mamembro sa maong hut-ong mao kadtong nakahuman na sa pag-eskuyla sa kolehiyo aron dili na sabal ang paghupot nila og katungdanan sa katilingban.

Matud pa sa gobernadora nga mas labing haum nga edad sa mahimong membro sa SK mao ang 21 anyos hangtud sa 30 o 40 anyos sama didto sa China.

Gipasabot sa gobernador nga ang angayang mangatungdanan diha sa grupo sa mga batan-on mao kadtong wala nay kabilinggan sa pagtuon aron makatutok kini sa pagtuman sa tahas nga gipiyal kaniya sa kagamhanan.

Matud pa ni Garcia nga gusto niyang tun-an sa SK ang mga paagi sa pagsulbad sa kagubot nga mugna ug binuhatan sa mga batan-ong mga miyembro sa mga fraternity o mga gang.

Gusto usab ang gobernador nga masanta usab sa SK ang dautang binuhatan sa mga batan-on sama sa vandalism o pagsuwatsuwat sa mga pader, poste ug uban pang lugar sa kadalanan kay nakahatag kini og kahugaw sa palibot sa syudad.  (BANATNEWS)