Pagpatangtang sa mga signages pasiuna lang

CEBU, Philippines - Giklaro ni Gob. Gwendolyn Garcia nga ang paghatag niya og kundisyon ngadto kang Cebu City Mayor Michael Rama nga ipatangtang ang mga signages sa South Road Properties nga nag-insulto sa kagamhanan sa lalawigan sa Sugbu, pasiuna lamang sa mga demanda sa dili pa sila makigsabot ngadto sa City Hall aron masulbad ang problema sa 93-1.

 Sumala pa ni Garcia nga ang lain niyang pangayuon mao nga dili na magpagawong ni Rama sa kanhi mayor ug karon si Cebu City South District Kong. Tomas Osmeña.

 Si Garcia miingon nga aron masukod sa kagamhanan sa lalawigan ang “good faith” sa dakbayan gikinahanglan nga sutaon ni Rama kun si kinsa ang iyang palabihon.

Ang kahadlok ba nga masuko ang kanhi mayor o ang kaayuhan sa liboan ka mga residente sa siyudad nga nagpuyo sa lote sa probinsiya ubos sa lote 93-1.

Ang gobernadora miingon nga bisan og walay labot sa suliran sa 93-1 ang mga billboards sa SRP apan kinahanglang tangtangon kini tungod kay mao kini ang makaguba sa kaugmaon sa maayong relasyon sa lalawigan ug sa dakbayan.

Ang maong mga signages gipabutang ni Osmeña atol sa ilang panagsungi sa gobernador. Pipila sa maong signages nagkanayon, “Please dim your light. This is not the province.”  (BANATNEWS)