Codilla overstaying na pailisan

CEBU, Philippines - Desidido na gyud si Mayor Michael Rama nga pailisan si Fire Marshall Esmael Codilla gumikan kay nalapas na kini og maayo sa iyang termino sa nahisgutan nga posisyon.

Matud pa sa mayor nga walo na ka tuig nga nagserbisyo si Codilla sa Cebu City Bureau of Fire Protection, isip bag-ong mayor gusto pud niya nga dunay kausaban sa nahisgutang departamento ug walay labot ang reklamo sa mga nasunogan sa T. Padilla batok sa maong opisyal.

Nagdumili hinuon si Rama sa paghatag og komento sa performance ni Codilla basta alang kaniya nga igo na ang walo ka tuig.

Giangkon sa mayor nga duna nay mga pangalan ang giduso sa iyang buhatan apan mag-agi gihapon kini og taas nga proseso sanglit gusto niya nga dunay katakos ang mohulip kang Codilla.

Usa sa iyang gikonsiderar sa bag-ong mapili nga fire marshall   nga gawas sa maayo nga motubag sa panahon sa emerhensiya, kabalo pud mopadagan ug modumala sa fire station ingon man sa iyang mga tawo.

Giklaro hinuon sa mayor nga iya pang ipakunsolta sa  Department of Interior and Local Government ang makab-ot niya nga desisyon.

Kahinumduman nga daghan sa mga biktima sa bag-ohay pa lang nga sunog sa T. Padilla ang wala mahimuot sa kalangay sa pag-responde sa mga bombero.

Apan si Codilla midepensa nga ang kahuot sa lugar maoy usa sa mga hinungdan nga naglisod sila sa pagsulod sa nasunugan.  (BANATNEWS)