CH gipahinumdoman sa ilang utang

CEBU, Philippines - Subling gipadad-an og suwat-pahimangno ang dakbayan sa Sugbo sa Saint Francis Funeral Homes kalabot sa ilang bayranan sa burial assistance nga nagbalor og P1, 336,000 pagserbisyo sa 167 ka mga minatay sa habagatang bahin sa dakbayan sa Sugbo.

 Matud pa ni Mayor Michael Rama nga magpatawag pa siya og tigom sa konseho aron maresolba ang maong utang apan kini mipasalig nga aduna gyuy pundo ang siyudad alang niini apan nagkinahanglan pa og igong proseso.

Samtang ang in-charge sa accounting department sa Saint Francis Funeral Homes nga si Enrique Lapetaje misaysay sa Banat News nga wala sila maningil, ang ilang gibuhat mao ang pagpahibalo lamang sa siyudad sa ilang balanse nga nagikan pa sa unang bahin karong tuiga sanglit naa naman kini karon sa bag-o nga administrasyon.

“Kasabot man gyud mi ana. Taas gyud na og process sa gobyerno,” nagkanayon si Lapetaje.

Masaligon hinuon ang maong punenarya nga mabayran gyud sila sa siyudad sanglit pila na nila kini ka tuig nga kliyente ug normal na usab nga malangay usahay ang pagbayad.

Dugang pa ni Lapetaje nga ang serbisyo maoy naa sa ilang huna-huna karong panahona ug mihangop sa maong programa sa siyudad nga paghatag og burial assistance sa ilang mga konstituwente. (Uban sa reporter ni Gloribee Aroma,USJ) (BANATNEWS)