Nag-videoke gipusil patay

CEBU, Philippines - Patay ang usa ka batan-ong lalaki nga gipusil sawala hiilhing lalaki nga nagsakay og motorsiklo alas-9 pasado ang takna sa miaging Sabado sa gabii diha sa sitio Sangi sa barangay Pajo dakbayan sa Lapulapu.

Ang biktima mao si Alfredo Samson Aro, 23, nagpuyo sa barangay Canjulao sa maong dakbayan ug ang nagpusil mao ang usa sa tulo ka mga wala mailhing lalaki nga pulos batan-on ug kasarangan lamang ang panglawas.

Si SPO2 ErnestoFrancisco sa Homicide Section sa kapolisan sa maong dakbayan nga nahinabi sa Banat News miingon nga nagkanta ang biktima sa sulod sa videokehan sa maong dapit dihang gipusil patay.

Ang angkas gikatahong mikanaog sa motorsiklo ug misulod sa videokehan dayong walay daghang pangutana gipaulanan og bala ang biktima nga nakaingon sa hinanali niining kamatayon.

Matud pa ni Francisco nga human sa maong pagpamusil dali usab nga misakay og balik sa nagpaabot nga motorsiklo ug mipabulhot pahilayo sa maong dapit.

Si Aro nga nahiagum og daghang samad pinusilan sa iyang kalawasan agi sa usa ka kalibre .45 gidala pa sa mga sakop sa Emergency Rescue Unit Foundation (ERUF) ang biktima ngadto sa Lapulapu District Hospital apan gideklarar kini sa mga doktor nga dead on arrival.

Nakuha diha sa crime scene ang duha ka basiyo sa kalibre 45 nga bala nga gituohang maoy gigamit sa mamumuno.

Si Francisco miingon nga sa kasamtangan angmga sakop sa homicide section sa kapolisan sa maong dakbayanang padayon pa sa ilang imbestigasyon alang sa pa-ila ug pagpasaka og kaso ngadto sa korte. (BANATNEWS)