Hot air balloon i-regulate na kay mimugna'g sunog

CEBU, Philippines - Mga residente sa barangay Camputhaw ning siyudad sa Sugbu ang nanawagan sa kagamhanan sa siyudad nga i-regulate ang pagpalupad niining mga improvised nga gamay nga hot air balloons human nakamugna og sunog sa usa ka panimalay sa ilang barangay.

Ang insidente sa sunog nahitabo mga pasado alas 7:00 sa gabii niadtong adlaw’ng Biyernes diha sa Purok 4 Lower Camputhaw, Cebu City.

Matud pa ni Ramer Salonoy, 25, usa sa mga komentarista sa radyo ug magtutudlo sa usa ka unibersidad ning dakbayan ug nagpuyo sa maong lugar adunay balay nga misilaob ang atop gumikan niini.

Sumala pa niya nga nagkalayo na ang sin nga atop sa iyang silingan nga si Arce Dandan dihang gitugpahan sa atop ang gamay nga hot air balloon sa atop ug misilaob ang gas nga gibutang sa lata nga gihigot sa maong gamay nga hot air balloon. Matud pa ni Salonoy sa Banat News nga nunot sa pagdako ug pagsilaob sa kayo napaso ang tiil sa usa sa iyang mga silingan nga si Billy Lerion kinsa mitabang sa pagpawong sa kalayo nga dili makakuyanap.

Gitumbok ni Salonoy nga silang tanang mga silingan nagtinabangay sa pagkuha og balde aron isablig sa atop sa balay ni Arce Dandan hangtud nga kini napawong.

Dihang miabot ang kabomberohan sa siyudad sa Sugbu wala na kini makapasirit pa og tubig.

Si Salonoy nagkanayon nga siya ug ang ilang silingan nagduda nga ang maong hot air balloon gipalupad sa hawanan sa University of the Philippines UP-Cebu Campus sanglit nakakita man sila og uban pang mga gamay nga hot air balloons nga naglupad sa taas nga bahin sa UP Cebu Campus.

Gihangyo ni Salonoy ug iyang mga kasilinganan ang kagamhanan sa siyudad sa Sugbu nga gipangulohan ni Cebu City Mayor Michael Rama nga i-regulate lamang unta ang pagpalupad sa maong hot air balloons tungod sa peligrong dala niini.

Gisugyot usab niini nga mas maayo nga ang mga mahiligon og pagpalupad og gamay nga hot air balloons adto lang magpalupad sa daplin sa dagat aron sa dagat ra usab kini motugpa ug dili sa kabalayan nga makamugna na hinuon og sunog.

Sagad mokit-an ang pagpalupad og mga hot air balloons nga ginama sa papel de hapon atol sa Chinese New Year. (BANATNEWS)