CEBU, Philippines - Patay ang usa ka batan-ong lalaki nga giingong sakop sa Tau Gamma Phi fraternity human gipusil sa ulo sa gidudahang sakop sa Alpha Kappa Rho fraternity alas-3 pasado ang takna sa miaging kaadlawon diha sa dalan Gothong,sitio Mahayahay, barangay Subangdaku sa dakbayan sa Mandaue.
Ang biktima mao si Rodante Amodia, 34, nagpuyo sa maong dapit ug duha sa mga suspek ang nadakpan nga giilang sila si Ryan Asumbrado, 18, taga barangay Camputhaw sa dakbayan sa Sugbo, Daniel Carrido ug ang nakaipsot mao si RitchieMontalban, 21, taga Panagdait sa barangay Kasambagan, dakbayan sa Sugbo.
Ang duha nangadakpan atol sa gihimong follow up operation sa kapolisan human dunay nakatumbok kanila ug maoy mitultol sa kapolisan sa ilang gikahimutangan o pinuy-anan.
Si SPO1 Kerwin Bejer sa Investigation Detection and Management Bureau (IDMB) sa Mandaue City Police Office (MCPO) miingon nga kuyog sa biktima iyang mga barkada nga nag-inom sa maong dapit.
Dihang nasigpatan sa biktima ang mga suspetsado nga nagsakay og motorsiklo nga milabay sa maong dapit nagdali kini sa paggawas ug giduol ang mga suspek dungan sa pagsenyas sa kamot og (peace). Apan usa sa tulo ka mga lalaki giingong miibot sa usa ka wala matinong kalibre sa armas dayong pusil sa ulo ni Rodante.
Human sa maong pagpamusil ang tulo dali nga mipabulhot sa giluwanan nilang motorsiklo pahilayo sa maong dapit.
Si Bejer miingon nga si Sr. Insp. Leo Casul sa Special on Crime Operation sa (SOCO) sa Crime Laboratory mitug-an kanila human sa pagsusi sa crime scene ug sa patay’ng lawas ni Amodia nga usa ray igo sa biktima nga mao ang sa agtang.
Ang mga nadakpan nga gibalhog sa bilanggoan ang pasakaan og kaso sa kapolisan ug lakip na usab sa ikatulong suspetsado nga nakasibat ug padayon pa karong gipangita. (BANATNEWS)