Atraso nag-abot sa disko; 1 patay

CEBU, Philippines - Usa ang patay ug laing usa ang angol sa nahitabong pinusilay kagahapon sa kaadlawon atol sa gipahigayong disko sa kasaulogan sa pista diha sa barangay Canbantug, lungsod sa Argao.

Patay diha-diha si Roland Requina, 25, taga sitio Tigaw-tigaw, barangay Cansoji, Argao.

Si Requina nakaangkon og mga samad pinusilan sa walang dughan, ubos nga bahin sa tuong dughan, ibabaw nga bahin sa tuong bukton, tuong kamot ug tuong paa nga maoy hinungdan sa iyang kamatayon.

Ang suspetsado ngasi Samuel Tanaid Betonta, 39, taga barangay Linut-od sa maong lungsod nasikop ni Sgt. Ronnie Yambot, team leader sa 78th Infantry Batallion (IB) sa Philippine Army.

Ang grupo ni Yambot gidestino diha sa lugar aron sa pagmentenar sa kahapsay ug kalinaw sa maong okasyon.

Si Betonta gidala diha sa Isidro Kintanar Memorial Hospital tungod kay nakaangkon usab kini og samad pinusilan sa tuong paa.

Si PO2 Bernie Lao sa Argao Police Station nga nahinabi sa Banat News kagahapon nagkanayon nga base sa ilang nahipos nga report si Requina ug Betonta manag-atraso o nagkabangi na kaniadto.

Ang duha parehong namista diha sa Canbantug ug mitambong sa gipahigayong disko ug nakaabot diha sa diskohan.

Matud ni PO2 Lao nga diha sa basketball court diin gipahigayon ang disko ang duha nagkalalis ug nagginukdanay ug dayon nagpinusilay.

Si Requina mihagba diha kilid sa diskohan human matusak sa mga bala ang iyang lawas.

Si Sgt. Yambot miduol kang Betonta ug mipakalma sa suspetsado dayon iyaha kining giaresto.

Ang mga sundalo naka-recover og usa ka kalibre .45 nga pistola diha duol sa nahimutangan sa suspetsado ug usa ka kalibre .357 nga revolver nga kargado sa lima ka buhing bala sa kalibre .357 ug usa ka buhing bala sa kalibre .38 diha duol sa patay’ng lawas sa biktima.

Na-recover usab sa mga sundalo diha sa lugar nga nahitaboan ang duha ka kabhang sa bala sa kalibre .45 nga pistola.

Si Lao midugang nga ang iyang mga kauban mibalik ngadto sa lugar nga nahitaboan aron sa pagpahigayon og follow-up nga imbestigasyon kabahin sa insidente.

Ang Canbantug gihulagway ni PO2 Lao nga usa ka bukirang barangay sa Argao diin duna kini gilay-on nga sobra sa 20 ka kilometro gikan sa Poblacion ug gubaon pa ang karsada niini. (BANATNEWS)