Pagtangtang sa signages sa SRP hunahunaon pa

CEBU, Philippines - Dili pa andam si Mayor Michael Rama pagtubag sa gipangayong kundisyon ni Gob. Gwendolyn Garcia nga tangtangon una ang mga billboards sa South Road Properties nga giingong nag-insulto sa Kapitolyo bugti sa pagpadayon sa pagpakig-negotiate sa Kapitolyo aron masulbad ang problema sa 93-1.

Matud pa ni Rama sa interbyu sa DyRF nga dili pa siya makatubag sa kundisyones sa gobernadora tungod kay makigsulti una siya sa mga tawo nga iyang gitahasan sa pagtuon sa pagpakig-negotiate sa Kapitolyo.

Apilon usab sa pagpakigsabut-sabot sa mayor ang mga miyembro sa konseho kun unsay angayan nga himuon sa siyudad.

Gitun-an usab pag-ayo ni Rama kun unsaon pagpakita sa siyudad nga sensiro ug ‘in good faith’ ang ilang pagpakigsabot sa Kapitolyo.

Ang maong mga billboards sa SRP nga giingong gituyo sa pagbutang sa kanhi mayor ug karon Kong. Tomas Osmeña nga gihulagway sa Kapitolyo nga usa ka matang sa pagpang-insulto kanila.

Ang maong mga billboard nagtangag og mensahe nga nagkanayon "Please dim your light. This is not the province."

Hinuon giklaro ni Rama nga ang importante karon mao ang katumanan sa gihatag niya nga pasalig ngadto sa apektadong mga residente sa lote sa 93-1.

Dugang pa sa mayor nga nagpreparar usab siya karon sa sitwasyon nga biyaan siya sa iyang mga kaalyado sa partido nga dili na makauyon kaniya ug dili usab niya ipamugos ang iyang kaugalingon. (BANAT)