Gasolinahan gitulis

CEBU, Philippines - Gitulis sa duha ka nagtaptap sa nawong nga mga lalaking luwan og motorsiklo ang usa ka gasoline station sa barangay Langtad siyudad sa Naga niadtong Biyernes sa alas 9:00 sa gabii.Ang gitulis mao ang Star Oil Gas Station nga gipanag-iya sa magpapatigayong Teofisto Manuel Roxas nga molupyo sa maong lugar.

Matud ni PO2 Miguel Castañares sa Naga Police Station dihang nahinabi sa Banat News ang duha ka mga suspek sakay og motorsiklo nga miabot sa maong gas station.

Ang duha nagpakaaron-ingnong magpatobil apan kalit nga mikanaog ang angkas niini nga nagbitbit og wala matinong kalibre sa armas ug diretsong gitionan ang pump boy ug giguyod paingon sa kahera ug mideklarar og tulis.

Walay nahimo ang kahera kansang gawas sa paghatag sa P5 mil nga halin nila niadtong higayuna dayung sibat pahilayo sa mga suspek sakay sa motorsiklo.

Ang mga biktima ingon man ang asawa sa tag-iya nga si Loenilyn Roxas misumbong nalang ngadto sa kapulisan apan naglisod sila pagtumbok sa mga tulisan gumikan kay nagtaptap ug nag-helmet ang duha.

Nasuta nga sa gihimong pagsukitsukit sa kapulisan gitug-an sa gwardiya kansang pangalan wala makuha sa kapolisan nangihi kini niadtong higayuna hinungdan nga wala siya makabantay sa pagpanulis.

Padayon pa ang imbestigasyon sa kapulisan ug apil sa gitutukan ang posibilidad ang inside job nga anggulo. (BANAT)